وجّه الموسيقار محمد رحيم، انتقادا قاسيا لزميله الملحن عمرو مصطفي بعد تصريحات الأخير في برنامج "العرافة" التي تضمنت تقليلا من قيمة بعض نجوم الغناء والتلحين في مصر، وأكد رحيم أن مصطفى اعتاد خيانة "العيش والملح" ويتجاوز حدوده، ولا يدرك إنه مجرد ترس صغير في آلة إبداع كبيرة.
رحيم نشر صورة تجمعه وعمرو مصطفى عبر حسابه الشخصي على موقع الفيس بوك وعلق عليها برسالة طويلة قال فيها: صديقي عمرو مصطفى شاهدت حلقتك في برنامج العرافة للإعلامية بسمة وهبة، وكان ليا تعليق الحقيقة، شوف يا عمرو أنا ميهمنيش أبدا إنك تبقى عايش في كدبة كبيرة ومصدقها لكن يهمني إنك متفرضش الكدبة دي على الناس وتحاول تقنع بيها بعض شرائح الجمهور البسيط اللى ميعرفش حاجات كتير عن أسرار وخبايا المهنة بتاعتنا.
صديقي عمرو مصطفى شاهدت حلقتك في برنامج العرافه للأعلاميه بسمه وهبه وكان ليا تعليق الحقيقه شوف يا عمرو انا ميهمنيش ابدا...
تم النشر بواسطة Mohamed Rahim في الأحد، ٢ مايو ٢٠٢١
تابع قائلا: البلد مليانة مبدعين وعلى أعلى مستوى من الموهبة والدراسة والإبداع، وكل واحد ليه مدرسته وليه تجاربه اللى لازم تحترم، وكل واحد شق طريقه بنفسه وبذل مجهود لا يستهان به فأنت مش من حقك تقلل من حد، ولا تحط نفسك فوق حد ولا تغلط في حد من أبناء مهنتك المبدعين اللى كلهم ناجحين، سواء مطربين أو ملحنين.
ووجه رحيم نصيحة لعمرو مصطفى قائلا: اشتغل وانت ساكت والزم حدودك أنت مش أكتر من ترس في عجلة جوة مصنع جوة مدينة جوة بلد كاملة اسمها بلد الإبداع والفن والحضارة وهوليوود الشرق مصر.
وأضاف: أنا كل ما ابدأ معاك صفحة جديدة ترجع تخون الصداقة والعيش والملح، وتفاجئني بما هو أفدح من كل مرة قبل كده، كتير كنت بسكت وبقول مفيش داعي نكبر الموضوع، المرادي أنت بجد زودتها أوي كفاية غلط في الناس كفاية سخرية من مجهود الناس، كفاية تعدي على كل الناس اللي شقيت وحفرت في الصخر علشان تكون أساميها.
واختتم رسالته قائلا: وأنا كنت أتمنى أن الرد ده اسمعه من السيد نقيب الموسيقيين الفنان هاني شاكر أو رئيس جمعيه المؤلفين والملحنين د.مدحت العدل، ولكن كلهم سمعوا إهانة الناس وسكتوا ورمضان كريم محمد رحيم.
لمشاهدة أجمل صور المشاهير زوروا أنستغرام سيدتي
