استكمالا لوعده بكشف الحقائق المتعلقة بمؤامرة كانت تستهدف القضاء عليه نهائيا، وتدمير مستقبله، تحدث الفنان أحمد فلوكس للمرة الأولى عن تعرضه لسحر تسبب في إيذائه صحيا وعمليا، وجعله حسب وصفه "أعمى البصر والبصيرة"، ونشر صورة توضح مرحلة "الألم"، ووضع بجوارها صورة أخرى بعد تعافيه من "العمل السحري".
فلوكس نشر صورتين له عبر حسابه بموقع إنستقرام، واحدة تظهره حزين وتبدو عليه علامات الحزن والسن، بينما الأخرى بعد استعادة نشاطه وحيويته، وعلق عليهما قائلا: الصورتين دول ما بيفارقوش عيني ولا عقلي.. الصورة اللي ببدلة دي كانت في أسوء فترة في حياتي، رغم أني كنت ناجح وشركاتي بتنجح وبتتحرك وبشتغل، وكنت بستغرب أنا شكلي بيعجّز ليه.
وتابع فلوكس: وليه عامل كده وليه الأبيض بقي كتير في دقني، وليه مش سعيد، وليه مش مظبوط، وتساؤلات كتير رغم أني كل شويه كنت بسافر أعمل عمره لكن شكلي وحياتي ونفسيتي وتصرفاتي بتسوء لأسوأ.
وأضاف: فترة غريبة جدًا في كل حاجة، دي فترة اللي اكتشفت فيها حاجات كتير وحصل بعديها واقعة الأمن، دي الفترة اللي السحر والأعمال والدمار وشرور البشر والخيانة والغدر والتوهان ومش شايف حاجة.
أحمد فلوكس: كانوا بيدمروا في صحتي وفي حياتي وأنا مش فاهم حاجة
وواصل فلوكس قائلا: بكل ما هو سيء كانوا بيدمروا فيا وفي صحتي وفي حياتي وأنا مش فاهم حاجة.. معمي البصيرة والإحساس.. عجوز من الداخل، مربوط في حزن بلا سبب رغم نجاحي، مش عاوز أمثل مش عاوز حاجة ولا فاهم حاجة.
أضاف: وكل شوية مستشفى وكل شوية تعب والدكاترة مش لاقيه سبب طبي صريح.. والصورة التانية دي بعد ما ربنا عافاني وأكرمني بالشفاء والبصيرة والراحة، عافاني من أسوأ أنواع البشر.. عافاني من السحر والأعمال وأعطاني البصيرة لأرى من حولي جيدًا، وأرى قوة وعظمة ربنا في معطياته لينا، ورحمة الله الواسعة.
وقدم فلوكس نصيحة إلى متابعيه: قربوا من ربنا و أعلموا جيدًا أن لن يمسكم سوء وستنور بصيرتكم.. نصيحة اختاروا الناس اللي تبقى في حياتكم كويس.. وابعدوا عن كل شخص مؤذي و كريه، وما تتخدعوش بالمظاهر والكلام وقربوا قوي من ربنا.
واختتم فلوكس حديثه بالدعاء قائلا: يا رب أبعد كل أذى عن بيتي وأهلي وابني وعبادك يا رب .. وأعطيني القوى لأحمي أهل بيتي وأبني الصغير من الأذى .. ودمر كل من يحاول أذيتهم.
أحمد فلوكس تعرض للغدر والخيانة من أقرب الناس إليه
وسبق أن توعد فلوكس بفضح كل من تآمر عليه، وحاول توريطه في واقعة "فرد الأمن" الشهيرة التي حدثت في شهر رمضان الماضي، مؤكدا أنه اكتشف أن الواقعة كانت مدبرة للقضاء على سمعته، ووعد بفضح الأسماء الأسبوع الجاري، بعد الانتهاء من بعض الإجراءات القانونية، مشيرا إلى أنه تعرض للغدر والخيانة من أقرب الناس إليه، وحذر جمهوره من التعامل مع أي عائلة اعتادت تسهيل أمورها بالسحر.
أشار فلوكس في منشور مطول عبر حسابه بموقع الفيس بوك إلى أنه تعرض للكثير من الظلم، ولكنه كان يترك مصير الظالم لله لينتقم منه وقال: طول عمري ماشي بستر ربنا. بيحصلي حاجات كتير وبتظلم كتير وبشوف كتير وربنا دايما بينصرني رغم إني أصلا مبكنش عارف أنى اتظلمت.
أضاف: وكتير اتقال عليا حاجات كتييييير وبردوا مكانش بيفرق معايا لانوا كدب بس كنت بتضايق ان ازاي نحاول ندمر حد بالكلام او بالتشويه بس كان نجاحي في شغلي بيرد على سؤالي ... وعلشان كده مكنتش بهتم باي حاجه تتقال عليا.
وتابع قائلا: اتقال عليا كتير واتقال عني كل حاجه تقريبا ماعدا حاجه واحده بس مقدروش يقولوها علشان مش هاتتصدق لكن اتقال عني كل اللي ينفع يتقال واتأذي بيه ومكنتش بهتم وتلف الايام وكل اللي بيقول كلمه بلاقيه واقع فيها واقول الله يسامحه وخلاص.
وقال فلوكس: لكن في حاجه واحده حصلت وللأسف كان لازم ساعتها التزم الصمت لغاية ما اجيب حقي بس كنت موجوع منها ومن الظلم اللي حصل والغدر وحاجات كتير تخص الواقعة دي هاتكلم عليها بالتفاصيل الاسبوع اللي جاي وبالأسامي والاشخاص والتفاصيل بعد ما يكون كل حاجه قانونيه خلصت خصوصا ان فيها للأسف شخص للأسف اقل شيء يتقال عليه انو قذر ومفتري ولا يستحق المكان اللي كان فيه والحمد الله ربنا جعلني سبب انو يسيبوا ولسه هايحصلوا كتير لانو اذي ناس كتير وكان مرتشي ونجس وقذر.
أحمد فلوكس: واقعه فرد الامن الواقعة كلها ظلم وافتراء ومدبره للأسف
وواصل قائلا: واقعه فرد الامن الواقعة دي كانت كلها ظلم وافتراء و مدبره للأسف و مقصود بيها تدميري من واحده للأسف لا يوجد كلمه تتقال عليها غير انها مدمره و شيطانه و بردوا الاسبوع اللي جاي هاقول هي مين و قصتها ايه علشانً تعرفوا انا اتظلمت قد ايه لان الواقعة دي كانت بداية فقط و كان مخطط حاجات كتير لتدميري منها و من شخص بيئذي و يدمر فيا وبيستخدم شغله لحساب علاقاته الجنسية و قد ايه فضلت مستحمل الظلم وعلشان كمان تعرفوا احنا كبشر بقينا اذاي و عشان كمان تعرفوا ان كلمه ولاد الناس دي ماتتقلش لأي حد وعلشان تاخدوا بالكم من اختياراتكم و تعرفوا ان الغدر و الخيانة و الدمار ممكن يجي من اقرب ناس ليكوا وعلشان تبعدوا عن اي عيله ماشيه بالأعمال و السحر للناس ... وعلشان ارتاح اني اخدت حقي من أسوأ انواع البشر علي الارض ....
واختتم فلوكس منشوره قائلا: نهاية الاسبوع القادم بإذن الله سينتهي الظلم وسيري كل واحد تسبب في ظلمي واذاني في القصة دي آيات ربنا ووعده ..حقي قادم
لمشاهدة أجمل صور المشاهير زوروا أنستغرام سيدتي
