تحدثت الفنانة حورية فرغلي، لأول مرة عن ذكرياتها مع خطيبها الذي تُوفي قبل يوم واحد من حفل الزفاف، مؤكدة أنه الرجل الوحيد التي أحبته، ورغم مرور 21 عاماً على رحيله، لم تقدر على الوقوع في حب رجل آخر، وقالت إنها تعرضت لصدمة بسبب انفصال والديها بعد 48 ساعة فقط من ولادتها.
أضافت حورية فرغلي في حوار مع الفنان تامر شلتوت لبرنامج «في العمق»: «أنا شُفت الحب مرة واحدة في حياتي سنة 2002، مع خطيبي اللي تُوفي، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان يعاني من مشكلة خلال المشي، وكنا قد بعض في السن».
حورية فرغلي: كنت أراه أجمل رجل في العالم
وتابعت حورية فرغلي: «رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية إني سامعة صوته، كفاية وجوده في المكان ريحة برفانه، من ساعة ما مات وأنا مش لاقية حد غيره».
وواصلت قائلة: «قضينا سنتين سوا متخانقناش مرة، كل ما أطلع الأولى في الفروسية أروح البيت ألاقية جايب لي تورتة كبيرة عليها صورتي ولعب، بدور على حبه مش لاقية، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كدة».
وأضافت فرغلي: «من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له انت قولي يا طنط».
وتابعت حورية فرغلي: «أنا معنديش صحاب ومبخرجش خالص، وبحب الحيوانات جداً، كان عندي 13 كلب دلوقتي بقا 1، وعندي 8 أحصنة، مبخرجش مع الناس لأن محدش بيعزمني على حاجة، اتعودت اعيش لوحدي وبراحتي، بيتهئلي لو أتجوزت مش هستحمل حد ينام جمبي على السرير، كمان هيبقى في مشكلة، لأني بحب أمشي في شقتي براحتي وأجري مع الكلاب، مش شرط كل يوم ميكب وشعر ورموش، أنا باكل ضوافري أصلاً».
حورية فرغلي: طفولتي كانت صعبة
وتحدثت حورية فرغلي عن أكبر صدمة أثرت في حياتها منذ الطفولة قائلة: «طفولتي كانت صعبة، بابا وماما انفصلوا وأنا عندي 48 ساعة، أكتر حاجة عايزة أنساها هي طفولتي؛ لأني اتحرمت من الطفولة والمراهقة».
وتابعت: «الدادة بتاعتي كانت أحن واحدة عليَّ، كانت فلبينية وقعدت معايا لحد ما بقى عندها 73 سنة وماتت، كنت بقولها يا تيتا، زوج ماما كان حنين عليَّ، وزوجة بابا ماتت في غارة من غارات العراق، ورأسها طارت قدام عيالها ماتت موتة صعبة».
وواصلت حديثها قائلة: «بسبب حجم الأذى وأزمات الطفولة، أنا قعدت 8 سنين مبتكلمش، ولا بنطق خالص، الدكتور قال لماما بنتك مبتتكلمش؛ لأنها محتاجة حب وحنان كتير».
كما تطرقت حورية فرغلي إلى أخطائها، ومدى استعدادها للموت، حيث قالت: «غلطتي إني مش محجبة، لكن بصلي وبصوم وبطلع زكاة، وحجيت 7 مرات، لكن معملتش ولا عمرة عشان كان لازم يكون معايا محرم، وأواظب بشكل يومي على قراءة سورة الملك قبل ما أنام، وبدعي ربنا يثبتني عند السؤال».
لمشاهدة أجمل صور المشاهير زوروا «إنستغرام سيدتي»
وللاطلاع على فيديوغراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
