وجهت الفنانة حورية فرغلي تهديداً مباشراً إلى ريم طارق طليقة مطرب المهرجانات حسن شاكوش، حذرتها فيه من تكرار الزج باسمها في أي قصة تتعلق بكواليس طلاقهما، وقالت حورية إن الموضوع صار يقلقها، وترددت طويلاً في الرد عليه، ولكن ريم تتعمد الزج باسمها من أجل التريند.
وقالت حورية فرغلي في بث مباشر عبر صفحتها الرسمية على موقع الفيس بوك: الأستاذة ريم طارق طليقة حسن شاكوش اللي أنا معرفهاش خالص ولا عمري شوفتها، اتقال اسم حورية وثالث حرف (ر) الناس سابت كل الأسامي ومسكت في حورية سكت ومتكلمتش خالص، إنما يجيلك الجرأة أنك تنزلي أن الفنانة حورية فرغلي تكشف عن اسم الفتاة اللي كانت مع شاكوش لغاية هنا بقا واستوب".
حورية فرغلي: رد فعلي سيكون فوق احتمال طليقة حسن شاكوش
وأضافت: "وطلعتي واعتذرتي ليا أنا مطلبتش منك اعتذار بتعتذري على إيه وليه تجيبي اسمي من الأول أنا أكبر من كده بكتير، انتي يمكن مش واصلك بس أنا أكبر من كده بكتير، وعمري ما جبت سيرة حد وطول عمري في حالي، واسم حورية فرغلي متقولهوش تاني، انتي بتقوليه عشان تطلعي تريند، ولو قولتي اسمي تاني أنا آسفة على رد فعلي اللي هيحصل لأن ده حقي، وربنا يهديكي يا بنتي".
حورية فرغلي تهدد برفع دعوى تشهير
وتابعت: "أنت عايزة إيه بالظبط، أنت عايزة تريند عايزة تجيبي اسم حورية فرغلي عشان تطلعي تريند، أنا أعرف منين البنت اللي كانت مع حسن شاكوش، وعلى فكرة أنا ممكن أرفع عليكي قضية تشهير، أنا مصورة الخبر وبعتوا لريهام سعيد وعندها بعد أما قولتي كدة أنا سكت وبرضو مش عايزة تعدي الموضوع اللي أنا مليش علاقة بيه لا من قريب ولا من بعيد".
حورية فرغلي: أحترم الصغير والكبير
واختتمت حورية حديثها: "في حاجة أنا عايزة أقولها أنا بحترم الصغير قبل الكبير بحترم نفسي وبحترم كل الناس أنا اتربيت على كده، اتربيت في بيت عيلة وعيلة كبيرة ومعروفة واتعلمت يعني إيه أخلاق وأصول وقيم فمش هقولك غير ربنا يهديكي يا بنتي لنفسك وتبطلي تجيبي في سيرتي لأن بجد المرة الجاية لو جيبتي في سيرتي أنا هشتكيكي بالتشهير وصدقيني مش هتستحملي ومش هتتخيلي هيحصل فيكي إيه، اسم حورية فرغلي متقولهوش عشان تطلعي ترند مسمحلكيش تقولي اسمي مرة تانية".
ريم طارق رفضت الاعتذار من حورية فرغلي
وسبق أن رفضت ريم طارق طليقة مطرب المهرجانات حسن شاكوش، الاعتذار من الفنانة حورية فرغلي بعد الزج باسمها في أزمة الطلاق، وقالت ريم أنها لم توجه أية إساءة للفنانة المصرية، وحورية نفسها قالت إنني لم أذكر اسمها ولم أزج بها في قصة الخيانة، فلماذا أعتذر؟
وقالت ريم طارق خلال لقائها مع الإعلامية مروة صبري ببرنامج "قعدة ستات" المذاع على شاشة "القاهرة اليوم": حورية فرغلي قالت إني ماذكرتش اسمها وأني قولت حرف بس، وهي مش زعلانة وأنا ماجبتش سيرتها، ومش هعتذر لأني مقولتش مين الشخصية.
ريم طارق: لن أحارب من أجل شاكوش
وتابعت ريم قائلة: أنا ما حاسبش ست، الشخص ده لو مكتفي بالبنت اللي اتجوزها مش هيبص لحد، الناس بتقولي أبسط حاجة روحي لجوزك مش هروح للغريبة أقولها ليه بتعملي كده، ولا هقعد أحارب في الناس، أنا بشوف أن الشخص لو مش محترم الشخصية اللي معاه خلاص يسيبه لحد تاني يقدره ويحترمه".
قصة الزج باسم حورية فرغلي
وسبق وأن أكدت ريم طارق، طليقة المطرب الشعبي حسن شاكوش، على أن أحد أسباب طلاقها من “شاكوش” هو علاقته بـ فنانة مشهورة تعاني من أزمة صحية، وثالث حرف من اسمها راء، وتكهن البعض وقتها أن المقصودة هي حورية فرغلي.
وقالت ريم طارق طليقة حسن شاكوش، خلال حوار مع برنامج 90 دقيقة: "في نهار رمضان كان مع ممثلة مشهورة والمفروض عندها مشكلة صحية في شاليه في السخنة هو مسجل اسمها بالعربي، وكانت كاتبة له إنت وصلت يا حبيبي؟ وبينهم علاقة وحبت في وقت إنها تسمعني صوتها كانوا مع بعض وقعدت تضحك بس حلال عليها.
وأضافت: "30 يوم في رمضان أنا بشوف حاجات زي اللي بحكيها دي على حاجات مختلفة، وأن ثالث حرف من اسمها هو الراء".
حسن شاكوش تقدم باعتذار من حورية فرغلي
ورد حسن شاكوش، على موضوع علاقته مع حورية فرغلي، عبر حسابه على الفيس بوك، قائلا: " جمهوري الغالي كل معاني الشكر ليكم ولكل شخص متفهم الموقف وشاركني البوست أنا شفت معظم التعليقات ومحترم كل شخص وكل كلمة حتى لو هي عكس الحقيقة.. وسكوتي وعدم ردي شئ مريحني أكثر من الكلام".
وتابع: "ولكن في شئ يخص فنانة جميلة كلنا بنحبها وبنحترمها وحقيقي أنا لا أعلم صحة الكلام اللي بيتقال ولكن أنا من خلال صفحاتي الرسمية أحب أقول إن الفنانة حورية فرغلي لا يمسني بيها أي شئ غير أنها زميلة وصديقة عمل ومش فاهم سبب وجود سيرتها في الموضوع إيه من خلال البرامج".
واستكمل: "أنا دلوقتي كلامي للإعلام أرجوكم بلاش تشاركوا الناس كلام غلط كفاية كلام في تفاصيل وحياة شخصية اللي ظاهر للناس يخص الناس.. أنا دلوقتي بمتنع عن أي كلام في حاجة تخص حياتي الشخصية أرجوا احترام رغبتي مع احترامي لكل الصحافة المصرية ولكن الأخبار غير الحقيقية دي بتضعف موقفكم في يوم من الأيام لما الحقيقة تبان".
وأضاف: " كل الاحترام والتقدير ليكي يا فنانة يا كبيرة وبعتذرلك مرة أخرى عن أي شئ اتحطيتي فيه".
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
