كشف الفنان شريف منير تفاصيل اللحظات الأخيرة قبل وفاة الفنان طارق عبد العزيز عن عمر ناهز الـ55 عاماً، مؤكداً أن الفقيد كان يشاركه التحضيرات لتصوير مشهد من مسلسل وبقينا اتنين، وفجأة تحول لون وجهه إلى الأبيض الشاحب ولفظ أنفاسه الأخيرة، نافياً صحة ما ردده البعض عن وصول طارق إلى المستشفى وهو على قيد الحياة.
وقال شريف منير، خلال مداخلة هاتفية في برنامج "الحكاية" مع الإعلامي عمرو أديب: "كان عندنا تصوير في فيلا في أكتوبر، والمفروض الفيلا دي كانت ديكور طارق عبد العزيز اللي بيلعب شخصية شريف، وكنا من الساعة 11 الصبح بنشتغل، وهو كان موجود وفي حالة تألق عالية جداً وحالة نفسية كويسة جداً، ونشيط وبيهزر وكل حاجة كانت ماشية بشكل لطيف وطبيعي".
مات أثناء عمله.. تفاصيل اللحظات الأخيرة في حياة الفنان طارق عبدالعزيز يحكيها شريف منير
يعرض الآن مجاناً على شاهدhttps://t.co/F1F4MP23a7 #الحكاية#MBCMASR pic.twitter.com/wxZ4c2HqTQ
— الحكاية (@Elhekayashow) November 26, 2023
آخر كلمات الفقيد: مش قادر أقف على رجلي
وتابع قائلاً: "وفيه مشهد كنت بعمله معاه ومع ممثلة شابة اسمها نانسي، عملنا بروفة وبعدين صورنا أول مرة الشوت، وبعدين طارق طلب نعيده مرة كمان، ووقفنا وجاهزين، قبل ما نقول «أكشن»، طارق جيه ناحيتي والمفروض يروح تجاه الباب، أنا شوفت لونه بيروح.. وبعدين فجأة سند عليا وقعد على كرسي وسند دماغه، وقالي مش قادر أقف على رجلي.
شاهدي المزيد: وفاة الفنان طارق عبد العزيز أثناء تصوير مسلسل "وبقينا اتنين"
وأضاف شريف منير: وفجأة اتحول وش طارق عبد العزيز للأبيض الشاحب، وبدأ يتلج ويروح مننا، فنزلناه على الأرض ورفعنا رجله وحاولت أدلك قلبه، وعينه مرفوعة لفوق، وفتحت القميص حطيت ودني على قلبه مسمعتش حاجة، وشيلناه بسرعة وروحنا على أقرب مستشفى، ولما روحت الحقيقة طقم الدكاترة وخدمات سريعة وحوالي 8 أو 9 دكاترة بيحاولوا، وقعدوا يحاولوا كتير، والدكاترة قالوا إنه كان جاي متوفى زي ما أنا حسيت".
طارق عبد العزيز كان سعيداً بأجواء التصوير
واستكمل شريف منير حديثه عن لحظة وفاة طارق عبد العزيز، قائلاً: "عملنا قبلها مشهد وكان متألق وقال يا جماعة أنا مبسوط بالشخصية جداً جداً، وإوعوا تخلصوني في يومين تلاتة عايز أقعد شوية وأدي في الدور أكتر.. قولناله: لسه عندك كتير والمفروض نعرض 2 ديسمبر، والخبر كان صاعقة بالنسبة لنا كلنا وحسيت بجد إن الدنيا دي متستاهلش حاجة".
شريف منير: أول مرة أشوف روح بتطلع
وواصل شريف منير: "إحنا بنقول الجملة دي كتير وبنقولها وبننساها، دي أول مرة في حياتي شوفت فيها روح حد بتطلع، اللحظة ديه أثرت فيا فوق ما تتصوروا، أنا مهزوز وكل الناس مش مصدقة، وابنه معتصم كان معانا وماسكله شغله وجري عليه، وكان موقف صعب أوي وعرفت إن طارق كان عامل دعامات قبل كده وعنده سكر وكان مزود التدخين شوية وهو طول ما هو ماشي يقول: متشربش سجارة وإوعى تدخن. والنهارده كان على غير العادة مكنش بالإقبال على الحياة واللطافة اللي كان فيها النهارده، كان لذيذ أوي".
واختتم حديثه، قائلاً: "شوفت بعينيا كائن مختلف النهارده كان لذيذ أوي وفي حالة مختلفة تماماً، الحكاية دي حصلت في ثواني، الله يرحمه ويحسن إليه والسيناريو اللي أنا شايفه قصادي ميبانش إن فيه تعب حصل".
عمرو عرفة شاهد عيان على لحظة الوفاة
وحكى المخرج عمرو عرفة تفاصيل الدقائق الأخيرة قبل رحيل الفنان طارق عبدالعزيز عن عالمنا، وقال عبر حسابه بموقع «إكس»: "كان بيصور آخر شوت له الساعة 4 عصراً، وآخر جملة قالها للفنان شريف منير: تعالى فيه مفاجأة.. وخبط على كتفه، وخرج من الشوت قعد على الكرسي ورا الكاميرا، وفاجئ الكل وانتقل إلى الرفيق الأعلى.. طارق عبدالعزيز فاجئنا كلنا.. الله يرحمه".
لمشاهدة أجمل صور المشاهير زوروا «إنستغرام سيدتي»
وللاطلاع على فيديوغراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
