بعد الكثير من المنشورات الحزينة بسبب تعرضه للتنمر بعد إعلان غصابته بمرض البهاق، واعترافه بوجود طاقة سلبية تحاول إعاقة صدور ألبومه الجديد، يبدو أن المطرب المصري رامي جمال تجاوز أزمته، ووجه رسالة مؤثرة لكل من وقف بجواره وسانده، حتى يكتمل تسجيل الألبوم الجديد وتصوير الكليب.
رامي نشر صورة له عبر حسابه بموقع إنستقرام وهو يرسم علامة قلب بيده تعبيرا عن المحبة، وعلق عليها قائلا: شكرا لكل حد صدق فى موهبتى شكرا لكل حد ساعدنى من يوم ما فكرت فى المزيكا لحد النهارده.. شكرا لكل أصدقائى اللى بتساعدنى علشان الألبوم والكليب يخرجوا بالشكل ده أنا مبنساش حد ساعدنى، وإن كان ليا عمر ربنا يقدرنى على رد الحب بالحب.
وأضاف في منشور آخر: دايما عندي ثقه في ربنا ان بكره احلي كل احباط بيقلب بتحدي اني اثبت اني قادر انجح وارفع راسي ورأس كل اللي راهنوا عليه يارب الالبوم ده يبقي النقله اللي مستنيها
يذكر أن رامي جمال كاد أن يعتزل الفن نهائيا بسبب تعرضه للتنمر داخل الوسط الفني والاستبعاد من احياء الحفلات بمجرد ظهور علامات مرض البهاق على جسده، ونشر رسالة حزينة عبر كل منصاته على مواقع التواصل الاجتماعي أكد فيها إنه لم يعد قادرا على إخفاء المرض وبنفس الوقت لا يتحمل تجنب بعض الناس له بمجرد رؤية بقع البهاق ظنا أن المرض معدي، وأشار إلى أنه أمام خيارين إما استكمال مسيرته الفنية على أن يتقبله الناس بهذا الوضع أو الاعتزال نهائيا.
وأكد رامي، إنه أصيب بالمرض منذ فترة لكنه لم يكن ملحوظًا من ثم بدأ في الانتشار بجسده بطريقة سريعة مما جعل البعض ينفر منه ويرفض حتى مد اليد للسلام عليه وقال: الحمد لله الذي أحبني فابتلاني وقدرني على الصبر.. من فترة ظهرت بقع بيضا في جسمي وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة.
وأضاف: رضيت وسلمت أمري لله عشان عرفت إن الزعل بيزوده وكفاية شغلانتي وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللي بقى يقوللي هتتعامل إزاي وأنت فنان واللي يخاف يسلم عليا واللي يسألني هو ده معدي.
فشلت كل محاولات رامي جمال لإخفاء مرض البهاق
وتابع: أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني اعمله عشان الناس مش هتقبلك كدة، وفكرت في كلامهم بصراحة.
واستكمل: لقيت إن عندي حلين يا فعلا شكرا لحد كدة على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة إن شكله غريب، والحمد لله على نعمة الأهل لأنهم الوحيدون اللي بيقبلوا الواحد زي ما هو.
واستقبل نجوم الفن رسالة رامي جمال بتعاطف كبير دفعه للتراجع عن قرار الاعتزال، وأكد استمرار مشواره كمغني وملحن وقال أن الابتلاء إلى هدية بسبب هذه المحبة.
وكتب "رامي" عبر حسابه الشخصي على موقع الفيس بوك: الحمد لله أولا وأخيرًا.. أنا عاوز أقول كلام كتير عن اللي شوفته منكم.. كلمة شكرًا قليلة على مشاعركم وعلى رقي كلامكم وعلى الوقت اللي ضيعتوه علشان تحسنوا الصورة المظلمة اللي كانت في عيني.
تابع قائلا: أنا بقيت شايف الابتلاء دة هدية من ربنا علشان أشوف الحب دة.. والله دموعي مبتقفش وأنا بشوف كلامكم.. أوعو تبخلوا على أي حد بدعم نفسي زي اللي دعمتوني بيه.
رامي جمال: الكلام الحلو قولوه على طول
وأضاف: إحساس الحب بينور الدنيا بيرجع الروح والأمل اللي أنتم عملتوه ميتقدرش.. ثانيًا عاوز أشكر زملائي الفنانين على كل كلمة حلوة وكل دعم شفته، هي دي الروح اللي نفسي تفضل موجودة مش بس بعد المرض ولا الوفاة.. الكلام الحلو قولوه على طول.. ليا ولغيري بيفرق جدًا.. الحب بيغير الضلمة لنور.
وواصل قائلا: ثالثًا لكل القنوات اللي بتحاول تتواصل معايا من إمبارح علشان تطمن عليا بشكركم جدًا بس أنا كتبت البوست ده علشان أنهي حمل على قلبي مش علشان أبقى تريند.. بشكركم طبعا بس أتمنى لما تقرروا تستضيفوني يبقى على عمل فني مش مرض.. مقدر شغلكم طبعًا بس أنا مش قابل فكرة مريض.. أنا الحمد لله اتأكدت بكلام الناس أني مش خايف ومش هترفض.. فبلاش أي حاجة تتفهم غلط شكرًا على اهتمامكم ومقدره، وبشوفكم في لقاءات فنية بعد نزول ألبومي ده أفضل نفسيًا كتير ليا.
رامي جمال: خلصتوني من سجن كنت عايش بيه
وقال: مفيش مانع ساعتها نتكلم عن أني إزاي اتعايشت بيه وهتعايش بيه لو ليا عمر الحمد لله علي الابتلاء.. الحمد لله علي حبكم ودعمكم ده دين هعيش بيه خلصتوني من سجن كنت عايش بيه كنت بصحي قبل ما أغسل وشي أعد البقع وأشوفها زادت ولا لا.. النهاردة صحيت نزلت وحبيت المحنة اللي ورتني قلوبكم وجمالها شكرًا من قلب قلبي.
لمشاهدة أجمل صور المشاهير زوروا أنستغرام سيدتي
