رامي صبري يجدد الصراع مع عمرو دياب: أغنية شكرا "بتاعتي" ورد قاسي من المؤلف والملحن

بعد مشاركة المطرب رامي صبري في تحدي أغنية "محسود" للنجم عمرو دياب، وتبادل الرسائل بينهما لإذابة الصراع المكتوم بينهما منذ سنوات، عاد رامي ليجدد الأزمة، مؤكدا أن عمرو أخذ منه أغنية "شكرا" بتواطؤ من الملحن والموزع عزيز الشافعي، وأكد صبري أنه لن يتعامل مع الملحن مجددا لأنه كرر فعلته للمرة الثانية.

رامي نشر عبر حسابه بموقع الفيس بوك منشور مثير للجدل قال فيه: ولتاني مرة الملحن عزيز الشافعي ياخد أغنية مني وإحنا شغالين فيها، ويديها لفنان تاني، وهو الفنان عمرو دياب بنفس الشكل التوزيعي والموزع، أغنية شكرا كده للي سبنا وأغنية زي مانتي.. لذلك قررت عدم التعامل معه مرة أخرى.

المثير ان رامي حذف المنشور بعد دقائق قليلة من نشره، كانت كافية لتثير ضجة عبر كل مواقع التواصل الاجتماعي ما دفع مؤلف الأغنية تامر حسين للتدخل وتوجيه رسالة غير مباشرة لرامي صبري عن أخلاقيات المهنة، والطرق الحضارية لإدارة مثل هذه الأزمات.

وقال تامر حسين: ردا على شكراً والمُهاترات اللى بسمعها، أولاً ليه بنجيب وبنقحم دايماً أسم (عمرو دياب) فى جُملة مفيدة؟ ايه الغرض؟ ثانياً... توقيت البوست لما الأغنية انتشرت وكسرت الدنيا بالتفاعل وإقبال الناس عليها والإشادة بيها يعنى ليه الكلام ده مكنش فى أول يوم مثلاً؟ ده لو فعلاً الكلام على حق.

تابع قائلا: ثالثاً... اللى اتعلمته ومن أدبيات المهنه ولازم الناس كلها تفهمه فكرة الذوقيات، يعنى ايه ؟ يعنى نبارك لبعض نهنى بعض مش نتهم الناس فى عز نجاحهم بالباطل لما أى مُطرب فى الدنيا بتعجبه اغنية المؤلف والملحن بيعملوا (تنازل عن حقوق الإستغلال) للمطرب، طالما ماحصلتش الخطوة دى من زمان تبقى الأغنية ملك الشاعر والملحن لحين إختيار الأفضل وارد جداً تسمع مطرب زميل اغنية من سنة سنتين ولضعف الرؤية الفنية مايتخيلش نجاحها ده اللى بيفرق مطرب عن مُطرب ف سُرعة إتخاذ القرار.

وواصل قائلا: أنا شايف ان فى تجنى على حق المُلحن عزيز الشافعى أدبياً ومعنوياً دى شهادة حق ومش شايف تماماً اى داعى يسمح بالكلام والصراعات دى، وللمرة المليون الناس المُحترمة ما تعلنش مشاكلها فى العلن، عيب فى خصوصيات ما يصحش ندخل الجمهور فيها ونتهم ناس محترمة بالباطل اكيد مش هنزل فويس نوت نستشهِد بيها واحنا (أصحاب الحق ) وربنا يهدى.

واختتم توضيحه قائلا: وأخيراً ياما ناس سمعت اغانى من سنه وسنتين ومكنش ليهم نصيب فيها ما عملهوش اللى بيتعمل ده لما الأغنية تنجح بالعكس فرحوا واتمنوا انها ياريت لو كت أغنيتهم بكل حُب وتقدير وروح حلوة وده بوست بكُل حُب والله عشان معنديش كلام يتقال تانى مش عايزين   الموضوع ياخد أكبر من حجمه هى شُهرة ل الأغنية أكتر بس ما بحبش الطريقة دى من الشهرة.

عزيز الشافعي لم يترك منشور رامي صبري يمر مرور الكرام، وأكد أن اقتراح عدم تعاونهما مجددا صدر عنه أولا وقال عبر حسابه الشخصي بموقع الفيس بوك: مش هرد بالتفاصيل على كلام الزميل المحترم، عشان لما الواحد يبقى ليه فضل بعد ربنا في نجاح فنان وبيزود رصيده مع الناس، بيعز عليه بعد كدة يقلل منه حتى لو تجاوز.

أضاف: ورغم إن كلامه كله (مالوش أي اساس من الصحة)، أحب دايما اشوفه ناجح و بيكمل اللي عملناه، وبشكره على إستجابته لطلبي و قراري الشخصي الي بعتهوله الصبح من خلال صديقنا المشترك محمد حامد بإننا منشتغلش تاني و نكتفي بنجاحاتنا.

واختتم عزيز رده قائلا: وبعتذر للسادة الصحفيين اللي بيتصلوا بيا مش عايز ادي الموضوع اكبر من حجمه وبكتفي بالبوست ده و بالكلام المحترم اللي كتبه زميلي و شريكي تامر حسين على صفحته عن أغنية شكرا، اما بخصوص زي مانتي فممكن ترجعوا للصديق المشترك محمد حامد و تسألوه وشكرا لحد كدة.

لمشاهدة أجمل صور المشاهير زوروا أنستغرام سيدتي

ويمكنكم متابعة آخر أخبار النجوم عبر تويتر "سيدتي فن"