بدأ النجم محمد هنيدي حملة ترويج جديدة لأحدث أفلامه "الإنس والنمس" واستغل إعلان نتيجة الثانوية العامة في مصر، ليقدم سبعة أسباب لمشاهدة الفيلم بطريقة كوميدية ساخرة، مؤكدا أن الفيلم يصلح للناجح والراسب والمرتبط والأعزب.
هنيدي قام بنشر صورة تحمل عنوان سبع اسباب تخليك تشوف فيلم الإنس والنمس، وعلق عليها عبر حسابه الرسمي بموقع الفيس بوك مقدما السبب الأول للمشاهدة بقوله: لو نجحت وجبت مجموع فتكون فرصة تحتفل، والسبب الثاني:لو سقطت او مجبتش مجموع فتكون فرصة تخفف عن نفسك.
تابع هنيدي: لو عندك مدير مزهقك او شغل تعبك ففي دراسة بلجيكية حديثة اثبتت ان الفرجة على أفلام هنيدي بتحسن المزاج وبتخليك تفكر أحسن ازاي تطفش المدير.
أضاف: لو جعان ففيه فشار في السينما ممكن يشبعك ومن غير سعرات حرارية تتخنك ولو عايز تتخن اضرب معاه بيبسي .. ولو عايز تخس بس بتحب البيبسي .. عندهم برده بيبسي دايت.
وواصل معددا أسباب المشاهدة قائلا: ان الناس بتشكر في الفيلم وفرصة تشوفه في السينما عشان ماتحسش انك غريب ومضطهد في المجتمع.
وقال: ان الفيلم صفعة على وجه هوليوود وبوليوود والصين اننا قادمون وهنعمل أفلام تمحو تاريخكم وماضيكم ومستقبلكم وحاضركم والمضارع والمضاف اليه؟
وواصل: ان الفيلم هيديك طاقة روحية هتوصلك لمكنون جوهرك وذاتك اللي بتبحث عنها من أيام ما كنت جنين.
واختتم هنيدي الأسباب السبعة بقوله: ان الحياة مابتقفش على حد .. فلو سينجل او ماعندكش صحاب .. ممكن تروح تشوفه عادي وتنبسط
هنيدي استبق المنشور بتنويه أكد فيه أنه سيبدأ الترويج للفيلم المتصدر لإيرادات السينما المصرية طوال السبوع الجاري، وكانه يطرح للمرة الأولى الليلة وقال: هبتدي ترويج لفيلم الإنس والنمس كأنه نازل السينما لأول مرة ... وهعيش الدور أوي .. فياريت ماحدش يفصلني ويقولي انه نازل من أسبوعين.
لمشاهدة أجمل صور المشاهير زوروا أنستغرام سيدتي
