كشفت الفنانة والإعلامية ريهام سعيد عن تعرضها لأزمة صحية جديدة، وأعلنت إصابتها بفيروس كورونا منذ أسبوعين، مؤكدة أنها محجوزة داخل المستشفى بعدما تسبب الفيروس في أضرار بالرئة، وأشارت إلى أن معاناتها من "مرض مميت" دفعتها لمحاسبة نفسها على أخطاء الماضي.
ريهام نشرت صورة تظهر ذراعها فقط وبداخله الجهاز المخصص للحقن بالمحاليل وبطاقة التعريف بالمريض، وعلقت عبر حسابها بموقع الفيس بوك قائلة: بقالى أسبوعين بعانى من كورونا والحمد لله الرئة اتاثرت واتحجزت فى المستشفى من شوية.. إحساس غريب وانت عندك حاجه مميتة.. بتراجع نفسك كتير وتحاسب نفسك كتير.. أكيد غلطت لكن عمرى ما قصدت كان دائما الغرض نفع الغير وإظهار الحقيقة".
وأضافت: "شكرا يا رب على حبك ليا وشكرا على ابتلائك.. إذا كانت دى النهاية يا رب أحسن خاتمتى واحسب لى كل عمل عملته لوجهك الكريم يا رب أنت الوحيد اللى عارف أنا عملت ايه وكانت نيتى دائما ايه.. استحملت وصبرت على افترا وظلم كتير".
وتابعت ريهام سعيد: يا رب اغفر لى وسامحنى وخلى بالاك من أولادى.. إذا كان ده اختبار من اختباراتك ولسه فى العمر بقية يا رب اشفينى واقف جنبى وسهل عليا محنتى أنا راضية بأى شيء.
واختتمت: نصيحة لكل واحد بيهاجم مشهور أو ناجح انت بتاخد ذنب رهيب انتوا بتاخذوا من أعصابنا وصحتنا وكله على باطل.. خلوا بالكوا الأذيه دى وحشة أوى وهاتقعد لك فى أعز ما عندك.. أرجو الدعاء بالخير ليا أيا كان هو إيه.
وسبق أن أعلنت ريهام في شهر يونيو الماضي عن إصابتها بمرض مزمن مشيرة إلى أن الفحوصات الطبية أظهرت إصابتها بمرض السكرى، وقالت إنها تتحمل مسئولية الإصابة بهذا المرض لأنها حملت نفسها فوق طاقتها في الفترة الماضية.
وقالت ريهام في مقطع فيديو عبر حسابها بموقع الفيس بوك: كنت دايما بتكلم عن الصحة وأقول أنها أهم حاجة، وطلع الصحة مربوطة بالحياة اللى انت تختارها، طلعت تحاليلى مافيش أوحش من كدة والحمد لله، وهو من التحاليل اللى ضايقتنى أوى بخصوص السكر".
وأضافت: أنا اكتشفت أن جالى سكر ودى حاجة لا ألوم عليها حد غير نفسى، لأن أنا اللى حملت نفسى فوق طاقتى وكنت دايما بقول أن ربنا مش بيدى حد حاجة غير على قد طاقته..
تابعت قائلة: السكر للأسف حاجة بشعة ولازم تحارب وما تاكلش وما تزعلش ودى حاجة صعبة أوى وسط اللى بنعيشه حاليا، لأن إحساس الظلم أكتر حاجة بتوجع وبتضايق.
واختتمت رسالتها بقولها: وعايزة أنصحكم ما تجوش أبدا على نفسكم ومفيش حاجة مستاهلة لأن كله بتدابير ربنا، وأهم حاجة لو ليكم أعداء زى ما الرئيس قال: لما تكون عايز ترد على منتقديك ما تقعدش ترد على كل واحد.
لمشاهدة أجمل صور المشاهير زوروا «انستغرام سيدتي»
ويمكنكم متابعة آخر أخبار النجوم عبر تويتر «سيدتي فن»
