أَعَادت خَبِيرة التجميل أسما شريف منير، ابنة الفَنّان شريف منير، الحديث عن أبرز مشاكلها النفسية التي تحاول علاجها في شخصيتها، ولم تخجل من الإعلان عن هذا العيب في شخصيتها ومحاولة إيجاد حل له، وذلك عبر منشور مطول عبر حسابها على «انستغرام»، تحدثت من خلاله للجمهور.
وكشفت أسما منير في المنشور الذي شاركته عبر حسابها الشخصي على موقع «إنستغرام» أنّ أبرز عيوبها هو عدم الاستماع للآخرين وقت الغضب. وكتبت معلقة: «النهاردة اكتشفت في نفسي عيب خطير وعايزة أحكيلكم عنه وإزاي اكتشفته وده الأهم، عشان ممكن يفرق مع شخص زي ما فرق معايا»، وأضافت أسما: «طيب إحنا طبعاً عارفين البداية دي، كلنا فينا عيوب والكمال لله وحده، بس ده ميمنعش إننا نحاول نتطور ونواجه نفسنا بعيوبنا عشان نكون في أفضل نسخة لينا، وأكيد عشان نقلل الأخطاء والأضرار اللي بتسببها عيوبنا علينا وعلى اللي حوالينا، أنا حكاية عيبي ده أهم من إني عرفته، عرفته إزاي؟».
تابعت أسما منير: «وهنا أنا بوجه شكر لشخص غالي علي قلبي جداً، اللي واجهني بعيبي، هو عارف نفسه أنا حقيقي بحترمك وبشكرك على طريقتك الراقية اللي علمتني بيها النهاردة أكتر عن نفسي». واستكملت: «عيبي إني (مبسمعش).. أنا عامل زي المترليوس وأنا زعلانة، والفكرة إني كنت فاكرة نفسي مستمعة جيدة جداً كمان، بس الحقيقة إني فعلاً وأنا زعلانة مش بسمع غير نفسي وصوت دماغي ووجهة نظري واللي مزعلني (بس) ومش بيكون هاممني غير إني أدلق اللي جوايا عشان أرتاح بدون أي تفكير في الطرف الآخر، وده حقيقي شيء مزعج وفي منتهى الأنانية، والحقيقة إن الطريقة اللي فوقتني هي النقد الإيجابي البناء اللي هدفه الأساسي الإصلاح».
واستطردت أسما في كشف تفاصيل عيوبها دون خجل ومحاولة إيجاد حلول لطبيعتها الشخصية: «وعشان كده تقبلته بكل أريحية وكمان تحمست على مواجهته وإصلاحه» وأضافت: «الشخص اللي مش بيسمع غير نفسه ده أسهل واحد ممكن يتسوح ويخسر ويزعل ناس كتير منه، والأهم غننا لو فعلاً بنحب حد وعايزاه يكون أحسن مش إننا بس نغلطه ونكسب المناقشة، لازم نلاقي طريقة هادية محترمة عشان فعلاً ننور عنده اللمبة اللي ممكن تغير شخص للأحسن». وأوضحت: «النقد البنَّاء مش مقصود به المديح، ولكن هو الأسلوب السلمي اللي الناقد قاصد بيه تحسين تلافي الأخطاء، والحكاية إن يكون الانتقاد ده مش لتسليط الأضواء على الجوانب السلبية؛ لكن إدراكها ومهم إن يكون النقد والمعرفة في تلازم مش أي عك».
واختتمت أسما منير: «أنا من حظي إنّ الشخص اللي انتقدني عنده قدرة عالية على انتقاء المصطلحات الأدبية اللي خلتني أتَقبل النقد برحابة صدر، وعنده وعي كافٍ للمناقشة، وإزاي قدر على إنّه يوصلني على تطوير نفسي من غير ما يدمِّرها، مش زي ناس كتير بتكون هدفها إسقاط غيرها».
