توقف المخرج محمد دياب، أمام تلميحات الفنان شريف منير بوجود "أهداف غير فنية" وراء جوائز لجان تحكيم مهرجان كان السينمائي، محذرا من خطورتها، ومن خطورة تصريحات شريف عن فيلم "ريش" للمخرج عمر الزهيري، لافتا إلى أن عدد كبير من نجوم الفن العربي انضموا للجان تحكيم مهرجان كان وغيره من المهرجانات العالمية ويمكنهم الإفادة إذا تعرضوا لأي ضغوط للتصويت لفيلم بعينه.
وأصدر محمد دياب مخرج فيلم "أميرة الذي عرض بالأمس في مهرجان الجونة، بيانا عبر حسابه بموقع الفيس بوك قال فيه: كلام الأستاذ شريف منير إن الجوائز اللي خدها فيلم ريش هي مؤامرة من الغرب على مصر كلام خطير جدًا خاصة إنه من فنان كبير".
وأضاف أنه سيتحدث عن خبرته في التعامل مع تلك المواقف بحكم أنه عضو لجنة تحكيم في مهرجان كان، متابعًا: "هتكلم من خبرتي كشخص عضو لجنة تحكيم في مهرجان كان، وعضو في أكاديمية الأوسكار، قولاً واحداً مفيش إنسان لا بالتلميح ولا بالتصريح عمره يحاول إنه يؤثر على اختيارات لجان التحكيم واللي أعضاءها بيتكونوا من فنانين مميزين من أنحاء العالم".
وأوضح أن إدارة أي مهرجان ينتهي دورها عند نقطة اختيار الأفلام المشاركة، مؤكدًا أن هذا الأمر يسأل عنه الفنانين الذين كانوا أعضاء لجان التحكيم في المهرجانات الثلاثة الكبرى والذين يأتي من بينهم هند صبري، ونيللي كريم، ومحمد حفظي.
وأكمل: "طب ليه الأفلام اللي بتروح مهرجانات بتبقي عن الفقرا أو عن المشاكل؟.. الأفلام المستقلة في العالم كله هي الأفلام اللي خارج منظومة الإنتاج التجارية، يعني الأفلام اللي مش لاقيه إنتاج ودي بتبقي دايماً الأفلام اللي عن المهمشين أو الناس اللي ملهاش صوت، وبما إنها أفلام مش متوقع منها تجيب فلوس فبيبقى عند صناع العمل الجرأة إنهم يعملوا اختيارات فنية جريئة وده بيخليها مغرية للمهرجانات اللي بتدور على سينما جديدة ومختلفة".
وأضاف أنه في عام 2019، كان الفيلم الذي حصد البالم دور هو (شوب ليفترز) الياباني، وفي 2020 حصد نفس الجائزة (باراسيت) الكوري، وبعدها اكتسح الأوسكار، كما أن الفيلمين عن العشوائيات في دول عالم أول، فضلًا عن أن بلاد الفيلمين احتفت بهما وبصانعيهم بالرغم من أن العشوائيات نسبتها في الدولتين لا تذكر.
وأوضح: "المميز في فيلم ريش مش الفقر على الإطلاق بل أسلوب مخرجه الجريء وطريقه سرده المختلفة، وسواء عجبك الفيلم أو لأ لازم نشيد بإن الفيلم ده فيلم بصوت و طعم مختلف فنياً مش موجود في السينما المصرية، الفقر و المشاكل لا يمكن يدخلوك مهرجان كبير لو مفيش جوده صنع أو تجربة سينمائية رائدة".
وتابع: "فيلم ريش فيه تجريد للمكان والزمان، والفقر فيه خلفية للقصة لدرجة إن المكان مش شبه مصر ولا أي مكان في العالم، ولو الفنانين نفسهم هم اللي بقوا بيرددوا الاتهامات اللي من نوعية تشويه مصر فدي مصيبة، لأن الكلام ده فيه مزايدة على الرقابة وعلى منتجي الفيلم، وعلى المهرجانات اللي بتختار الأفلام وهيخلي أي فيلم عن المهمشين متهم بالتزلف وبيصعب إنه ينتج أو يُجاز".
وأشار: "للأسف الكلام ده بيخلي الرأي الشعبي يبقي دايمًا حاطط أفلام المهرجانات في وضع المتهم، أكيد اختاروا الفيلم عشان سبب غير مستواه الفني، كلام فيه انسحاق وهزيمة، وكأننا معندناش القدرة نعمل حاجة كويسة، بمنطق أستاذ شريف كان هينسحب من عرض الفيلم العظيم الكيت كات اللي كان بطله وقدم فيه دور عظيم، وكنا اتحرمنا من أعظم فيلم مصري".
واختتم: "عمر الزهيري مخرج مصري واعد ويستحق مننا كلنا التحية والتشجيع، وفيلم ريش مدحه وذمه لازم يكون في داخل الإطار الفني فقط".
لمشاهدة أجمل صور المشاهير زوروا "انستغرام سيدتي"
ويمكنكم متابعة آخر أخبار النجوم عبر تويتر "سيدتي فن"
