بعد حظر تواجده على السجادة الحمراء لفعاليات الدورة الخامسة لمهرجان الجونة، ومنعه من حضور حفل الختام، تدخلت غادة والي، زوجة الفنان الشاب حسن أبو الروس، لدعمه وبنفس الوقت نفي شائعة انفصالهما، ووجهت له رسالة مباشرة أكدت فيها أنه يعمل بذكاء لتحقيق حلمه، وأشارت إلى أن اطلالاته المثيرة للجدل ليست مفتعلة ولكنها جزء من شخصيته.
غادة والي نشرت الرسالة بعنوان "للي ميعرفش حسن" عبر حسابها بموقع انستغرام واستخدمت ألبوم صور لزوجها ووضعت مقطعا من الرسالة على كل صورة وقالت: حسن ما بدأش السنة دي حسن بقالوا 15 سنة بيمثل، وبيعمل ورش وشارك فى مهرجانات عالمية زي افينيون في فرنسا".
وأضافت: حسن بياخد كل فرصة أنه يسعد اللى حواليه، أهله وصحابه، دار مسنين، أطفال، ملاجئ أو حتى ناس قابلها مرة في حياته فى الشارع، ودي رسالته الحقيقية، ونشر البهجة".
وتابعت غادة والي: حسن من صغره معروف بلبسه المختلف ومش خايف يبقي نفسه لدرجة ان صحابه فى الشغل القديم عملوله تورتة على شكل قميص مشجر"
وواصلت قائلة: فيه فنانين كتير عالمية ومصريين حسن متأثر بيهم، عندهم ذوق مختلف زي مايكل جاكسون، برونو مارس، الأستاذ سمير غانم وفؤاد المهندس، أحمد زكي، شكوكو، وغيرهم.
وقالت: وبرغم من المحتوى الكوميدي والمزيكا الديسكو، شعبي، اللى بيقدمه حسن بيشتغل ليل نهار 15 سنة علشان يوصل لحلمه، حسن اشتغل بذكاء لترويج آخر أعماله مع الفنانة دينا الشربيني، زي اى دويتو اتنين فنانين عملوه، وده جزء من الحملة مع شركة الدعاية، كل اللى قابل حسن وعرفه معرفة شخصية يعرف قد ايه هو جدع وصاحب موقف، ومتأخرش فى مساعدة أى حد يلجأ له، وده اللى خلا صحابه يقفوا يلبسوا أحمر فى فرحه".
واختتمت غادة رسالتها قائلة: وبرغم الحملات المقصودة ضده فشغله لسه تريند ومفيش حاجة هتوقف نجاحه لأن عزيمته أكبر بكتير، والناس اللى مش حابة أعماله ممكن تلغي متابعته بكل بساطة واحترام، ياريتكوا زي حسن فى شجاعته انه يبقي نفسه الحقيقية من غير ما يقلد اللى حواليه، ويمشي ورا الدارج، وفى معافرته انه يوصل لحلمه بمجهوده بدون أى واسطة أو معرفة في المجال، كلنا فى ضهرك وبنحبك يا أنضف قلب وألذ شيكالستك فى مصر، مبروك يا أبو علي.
يذكر أن حسن أثار الكثير من الجدل بسبب ظهوره المتكرر برفقة دينا الشربيني للترويج لأغنية "فلتت مني"، وانتقد عدد كبير من رواد مواقع التواصل الاجتماعي محاولاته لفرض نفسه باطلالات مثيرة وطريقة غير مناسبة في الحديث، وتردد أنه تم منعه من الظهور على السجادة الحمراء بقرار من إدارة مهرجان الجونة بعدما اقتحم حسن المؤتمر الصحفي للنجم أحمد السقا، ورفضه تعليمات اللجنة المنظمة بطريقة غير لائقة.
لمشاهدة أجمل صور المشاهير زوروا "انستغرام سيدتي"
ويمكنكم متابعة آخر أخبار النجوم عبر تويتر "سيدتي فن"
