كشف الدكتور محمد عبد الستار رئيس قسم الغناء بالمعهد العالي للموسيقى العربية، كواليس مقاطع الفيديو والصور المنشورة له برفقة مطرب المهرجانات حمو بيكا، أثناء الاستعداد لخوض اختبارات نقابة المهن الموسيقية، مؤكدا إنها التقطت دون علمه منذ عام تقريبا وليس الأسبوع الماضي كما قال بيكا، ووصف الأخير بالمخادع لجمهوره والذي لا يريد أن يتطور.
ونشر الدكتور محمد عبد الستار توضيحا مطولا عقب نشر بيكا الصورة مع تعليق يؤكد بدء الاستعداد لخوض الاختبارات من جديد، وقال عبر حسابه بموقع الفيس بوك: ردا على أصدقائي الصحفيين والإعلاميين المحترمين عشان ننهى الموضوع ده تماما، حمو بيكا شخص بيأدى نوعا من المزيكا أنا لا أؤمن به، ولا أسمعه ولكنه موجود ومنتشر ومش محتاج أى إنكار منى أو من غيرى.
وتابع: "رقم اتنين بكل بساطة النقابة عملت دورها قدام الإعلام، وأنهم يظهروا الحقيقة أنهم مش بيحاربوا حد من غير مبرر، وحبوا يساعدوهم أو يمدوا أيديهم بمعنى أصح لأشهرهم، ونظرا للثقة الكبيرة الحمد لله من أعضاء النقابة فيا وفى تاريخى فى تدريب الأصوات لأسماء كبيرة جدا دربتها طول حياتى، ومش هذكر حد منهم احتراما لخصوصيتهم، تم ترشيحى انى أدربه عشان يقدر يؤدى فى الامتحان، واللى حصل بكل بساطة أننا اتقابلنا مرتين ومن خلالهم قدرت أحدد هل هو يملك الموهبة اللى تخليه يؤدى فى الامتحان ولا لأ.
أضاف: "بعد المرتين اللى ممكن يكونوا بقالهم سنة تقريبا واللى اتاخدت فيهم الصور من غير علمى بالمناسبة، ما حصلش أى مقابلة تانى نظرا لعدم اهتمامه من الأصل أنه يطور من نفسه أكتر أو يحاول يكون أحسن هو بس بيحاول يكسب تعاطف، ويعمل استعراض أنه بيحاول وده مش حقيقى أبدا، وده كل الوضع بالتفصيل الدقيق".
وقال: "وبكده فعلا مفيش أى كلام تانى ممكن يكون عندى أو معلومات أكتر، الموضوع ده للأخوة الصحفيين المحترمين اللى بشكرهم على اهتمامهم اللى بردو كنت أتمنى يكون مساويا للدعم اللى بيتقدم على مدار سنين منى ومن زمايلى المحترمين، أن إحنا نقدم أصوات محترمة وتستاهل ونكون سببا فى رفع الذوق العام، ولسه أتمنى ده يحصل".
أضاف: "نقطتى الأهم ردا على أصدقائى الغاليين وولادى وبناتى الطلاب المحترمين، التعليم وتطوير النفس مش حكر على حد، الكل يستاهل فرصة يبقى أحسن لو هو عايز، لما أنا أرفض أعلم حد ناقصه حاجة أو حتى حاجات كتير، وهو أساسا المجتمع عمله نجم مش أنا وده أمر واقع، يبقى أنا بساعده بإيدى يفضل من سيئ لأسوأ وكده أبقى مش بعمل شغلى ودورى المفروض عليا، وبحب أعمله".
وقال عبد الستار: "المجتهد ضعيف الموهبة هينجح وهيبقى حاجة، ومتكامل المواهب اللى قاعد فى البيت مستنى الناس كلها تيجى تخبط على بابه هيفضل حياته كلها فى بيته، وأخيرا أنا دورى كمدرب للأصوات لفترة تعدى الـ30 سنة، وأستاذ دكتور ورئيس لقسم الغناء بالمعهد العالى للموسيقى العربية بيخلينى مستحيل أرفض أساعد حد، وبالعكس فيه أقل منه موهبة ويمكن شفت تعليقاتهم ومبسوط أنى قدرت أساعدهم بفضل ربنا يكونوا أحسن ويبقى كمان عندهم الثقة اللى تخليهم ينتقدوا، الكل يستاهل فرصة يتحدد له هو يقدر وعنده موهبة حتى لو بنسبة ولا لا.
يذكر أن نقيب المهن الموسيقية هاني شاكر صرح مؤخرا بأحقية بيكا في خوض الاختبارات من جديد العام المقبل، وبعدها نشر مطرب المهرجانات عدة صور له مع الدكتور محمد عبد الستار، وعلق عليها قائلا: أثناء تدريبى مع الدكتور محمد عبد الستار.. يا مسهل.. تدريبات لاختبارات النقابة.. ادعولى..
لمشاهدة أجمل صور المشاهير زوروا «إنستغرام سيدتي»
ويمكنكم متابعة آخر أخبار النجوم عبر «تويتر» «سيدتي فن»
