تقليعة جديدة ابتكرتها علياء البسيوني زوجة المطرب الشعبي أحمد سعد للكشف عن نوع الجنين، حيث اصطحبت زوجها لرحلة بالبالون الطائر، وطلبت منه شكشكة بالون منفوخ باللون الأسود، لينفجر وتظهر بداخله أوراق ملونة باللون "الوردي"، في إشارة إلى أن المولود القادم "بنت".
سعد قام بنشر الفيديو عبر حسابه بموقع انستغرام وظهرت زوجته متأثرة بأعراض الحمل، وعلق على الفيديو قائلا: الحمد لله الذي رزقني ما احب بنت الحمد لله.
يذكر أن أحمد سعد وعلياء البسيوني تم عقد قرانهما بصورة مفاجئة في شهر أغسطس من العام الماضي، بعد أيام قليلة من رواج أنباء أكدت فسخ الخطوبة وانفصالهما نهائيا، وأكد سعد بعد الزواج أنه لا يقدر على تحمل غضب الأخيرة لأنها "مش رخيصة"، وتدارك كلامه سريعا مشيرا إلى أنه لا يقصد أن السابقات كن "رخيصات"، وأشار إلى أن تعليقه المثير للجدل "أول مرة أرتبط بجد" كان حقيقيا لأن هذه الزيجة شهدت مشاركته بكل تفاصيل الحياة الزوجية.
وأوضح أحمد سعد، خلال لقائه في برنامج 90 دقيقة الذي تقدمه الإعلامية بسمة وهبة، على شاشة قناة المحور سر إصراره على عقد القران سرا والتكتم حول علاقته بعلياء البسيوني مشيرا إلى أنه جهز لعقد القران في يومين فقط، حيث حجز غرفة في فندق وحديقة من أجل التقاط الصور، مشيرًا إلى أنه كان شديد الحرص على عدم الإفصاح عن موعد عقد قرانه.
واستكمل: ولا مخلوق كان يعرف بميعاد الفرح، كل الناس عرفت من الصحافة وأنا مش عارف عرفوا منين، مفيش حد كان يعرف غير الدكتور سامح أخويا، ووالدتي حضرت طبعًا، وأخواتي زعلوا مني بسبب الموضوع ده.
أما عن زوجته علياء بسيوني، فقال عنها: حسيت إني أول مرة أرتبط، وده بسببي أنا، في حاجات كتير في حياتي معملتهاش، عملتها دلوقتي، وكنت دايمًا ناقم عليها ورافضها، مكنتش بعمل حاجات الناس الطبيعية لكن مع علياء عملتها بسبب السن والاختلاف.
أضاف: كنت ناقم على الخطوبة وقراءة الفاتحة والشبكة وإننا ننزل نجيب العفش مع بعض، والحاجات دي.. طول عمري ببص على الحاجات دي إن اللي بيعملها ناس قديمة، لكن اتضح لي إن أي حاجة لها علاقة بالعرف ليها أسباب، ومفيش أحلى منها.
وتابع: بعد ما كنت شخص مهرجل بقيت أخاف إن حد يدوس بالجزمة على السجادة لأني تعبت فيها واشترتها وفرشتها وفضلت واقف بعيد عشان أشوف شكلها، وشاركت مع علياء في كل تفصيلة وبقيت أخاف أزعلها لأنها مكانتش رخيصة وغالية جدا في كل موقف بيننا، تفاصيل الحياة بيننا مكنتش مقلوبة وكانت زي ما بتحصل في أي حياة طبيعية».
من جانبها، علقت علياء بسيوني زوجة أحمد سعد: أول ما عرفته وقالي هنتجوز ونقعد في الفيلا وبعدين نعملها زي ما إحنا عاوزين، قلت له هنقعد في شقة صغيرة نفرشها براحتنا.
واعترف سعد بأن سمعته سيئة عند الجمهور بسبب ما حدث في زيجاته الثلاث السابقة من أم أولاده والفنانة ريم البارودي والنجمة سمية الخشاب وقال: أنا الناس واخدة عني فكرة من ساعة المشاكل اللي حصلت وأنا متصالح مع ده جدا لأني بشوف اللي بيتكتب عني، الناس لو كتبت اسمي بس على جوجل هتشوف كل حاجة، أنا صلحت من نفسي لأني في كل المشاكل اللي فاتت كنت أنا المشكلة فيها.. أنا اسم على الفاضي يا بسمة والله.
وتابع قائلا: عشان أقدر أتقدم في حياتي مابقتش أشوف مشاكل في حد تاني، بقيت أشوف عيوبي أنا بس، عيوب الآخرين بتاعتهم، عشان أقدر أرتقي بنفسي، لكن مينفعش أبقى عايش في مظلومية وشماعة.
كما كشفت علياء بسيوني، عن تفاصيل بداية علاقتها بالفنان أحمد سعد، موضحًة أنهما تقابلا في صالة الألعاب الرياضية، ثم تطورت علاقتهما ولم يتوقع أحد من عائلتها ارتباطها به، مشيرة إلى أن أخاها من وافق على علاقتهما، ثم أصبحت علاقة أحمد بعائلتها جميعا جيدة للغاية.
ووجهت علياء أول نقد لزيجات أحمد سعد السابقة قائلة: أحمد لو كان وحش، كان هيبقى له رد فعل في أي حاجة في المشاكل اللي حصلت، مش معقولة دايما القصة تبقى من طرف واحد، مش معقولة المشاكل كلها تيجي من طرف واحد، في جانب مفقود من القصة، ولو كان وحش كان رد ودافع عن نفسه.
ونفى سعد ما تردد حول خضوعه لجراحات تجميل في العام الماضي وقال: لم أستخدم البوتكس أو الفيلير لسه موصلتش للحاجات دي بس هروح لها ومعنديش مشاكل معاها، لكن كان عندي مشكلة في الفك بسبب أسناني، والدكتور ظبطهالي من غير عملية جراحية، مفيش عمليات تجميل، لكن ده رباني.
ووجه أحمد سعد نصيحة لكل المقبلين على الزواج، قائلا: عايز أقول لكل اللي بيحبوا بعض وداخلين على مشورع الارتباط، قبل الجواز أنت بتقعد تفكر في المشاكل اللي ممكن تحصل لكن المشاكل دي بتنتهي تماماً بعد الجواز.
وأضاف: يعني علياء ما شاء الله، مش بتعرف تعمل حاجة في البيت خالص عشان كدا مشتريتش البوتجاز، خايف على نفسي.
لمشاهدة أجمل صور المشاهير زوروا «إنستغرام سيدتي»
ويمكنكم متابعة آخر أخبار النجوم عبر «تويتر» «سيدتي فن»
