بعد غياب استمر 5 أعوام كاملة عن المشاركة بموسم المسلسلات المصرية لرمضان منذ شاركت ببطولة مسلسل "لأعلى سعر" تعود النجمة الشابة رحمة حسن في موسم 2022 بالظهور كضيفة شرف مسلسل "ملف سري" من بطولة النجم هاني سلامة.
رحمة صورت بالفعل مشاهد مقتلها في مسلسل "ملف سري" مع الفنان هاني سلامة، وتظهر في المسلسل كضيفة شرف بعدد محدود من الحلقات، ولكن يمثل دورها إحدى الشخصيات المحورية بالأحداث، حيث تجسد دور الفتاة التي يحبها بطل العمل هاني سلامة، ويتم قتلها في ظروف غامضة خلال محاولة وقف عملية فساد كبرى.
ونشرت رحمة البوستر الخاص بها عبر حسابها بموقع انستغرام وعلقت عليه قائلة: رمضان كمان كام يوم انشالله استنوني في دور نور في مسلسل ملف سري علي قنوات كتير انشالله.كل سنة وأنتم طيبين.
وسبق ان قدمت رحمة حسن شكوى علنية من رفض المنتج هاني أسامة منحها بقية أجرها عن مسلسل "سابع جار" منذ العام 2018، كما كشفت سبب اعتذارها من الدكتور أشرف زكي ورفض وساطة نقابة المهن التمثيلية لحل الأزمة وديا وبعيدا عن السوشيال ميديا.
رحمة نشرت بيانا مطولا عبر حسابها بموقع إنستغرام قالت فيه: أولا كل الاحترام والتقدير للدكتور أشرف ذكي.. على استجابته وسؤاله.. وأحب اوضح ان الفلوس الي ليا عند هاني اسامه المنتج هي باقي اجري عن مسلسل سابع جار.. وكان ليا جزء كبير منها.. ولجأت للدكتور أشرف في ٢٠١٩ علشان يساعدني.. وحصل.. واداني جزء بسيط من فلوسي.
تابعت قائلة: وللعلم الوقت ده كان بابا تعبان وفي المستشفى وهاني اسامه كان عارف وقلت له إني محتاجة الفلوس ارجوك.. ورفض بعدها يديني اي فلوس من باقي اجري ومكانش بيرد علي رسايل او مكالمات مني.. للأسف بابا اتوفي بعدها بكام يوم..
أضافت رحمة حسن: ومن ساعتها وانا تعبانة ومش ناسيه هو عمل معايا ايه.. وكان صعب عليا اني اطلب تاني من دكتور أشرف انه يتدخل لان هاني مش بيستجيب اصلا..وانا كنت تعبت من كتر ما بطلب حقي وهاني بيتهرب.. بس بين كل فتره والتانيه كنت ببعت له رساله او اكلمه وبرضوا مافيش حاجه.
أشارت رحمة إلى أنها واصلت طلب حقها بكل ذوق ولكن لم تجد أية استجابة وقالت: كل ده بمنتهي الذوق والاحترام والرسايل موجوده معايا من ٢٠١٨ كله علي التليفون.. وطبعا الوقت بيعدي وانا معنديش شغل ماعنديش دخل.. تعبت وبعتله تاني من كام يوم وقلت له.. وبرضوا مافيش حاجه.. وكمان العقد بتاعي معايا ومخصوم منه الضرايب الي دائما بدفعها علي اي عمل بشارك فيه من زمان وواصلت سرد قصة الأزمة بقولها: العقد بتاعي علي مسلسل ٦٠ حلقه.. هاني صور وذاع ٦٧ حلقه يعني ليا كمان ٧ حلقات مش موجودين في عقدي وماختش عليهم كمان اجر و ماطلبتش بيهم اصلا بس هو عارف..الفكره انه طلع ان في كذا شخص في الشغل مش انا بس، عندهم نفس الموقف مع هاني.. ويمكن بفلوس اكتر بكتير وفي نفس الموضوع والنقابات والقضيه وما الي ذلك..
وخصصت رحمة حسن النصف الثاني من البيان لتوضيح سبب رفض وساطة نقابة المهن التمثيلية وقالت: اما بخصوص ان الدكتور اشرف طلب مني اني اروحله النقابه عشان نتكلم في الموضوع.. انا قلتله اني مش عايزه اتعبه اكتر من كدا معايا.. خصوصا اني عارفه اني مش نقابيه واني بشتغل بتصاريح ومش عايزه اضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فا تبع نقابه تانيه.. وكنت عارفه ان الدكتور اشرف كلمه قبل كدا في موضوع الفلوس ده و برضوا ماحصلش حاجه.. يعني لو كان عايز يدفع كان دفع من زمان..
واختتمت التوضيح قائلة: المسلسل اتذاع وخلص وهاني عمل بعده كذا عمل.. انا قلت للدكتور اشرف اني مش هاقدر اجي لاني تعبانه واني مش هاشيل البوست لحد ماخد فلوسي.. لاني بحاول اجيب حقي الي بقالي ٣ سنين مش عارفه اجيبه شكرا لكل حد اهتم.. بس انا حبيت اوضح ايه الي بيحصل.. وشكرا لكل الي ساعد والي بيحاول يساعد.. وللعلم انا لسه ماخدتش فلوسي برضوا.. شكرًا واخيرا.. لم ادلي باي تصريح صحفي ولست مسؤوله عن اي كلام يكتب بالنيابه عني.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
