تقدم المخرج عمرو سلامة باقتراح لصنّاع السينما المصرية، بإعادة تقديم كلاسيكيات السينما المصرية بصورة عصرية، مؤكدا أن الجيل الحالي الأقل عمرا من 20 عاما لا يعرف اسماعيل يس، عبد السلام النابلسي، شادية، فايزة أحمد ولم يشاهد أفلام اشاعة حب أو غروب وشروق، لأنه مشغول بالبحث عن الجديد، وأكد أن إعادة تقديم هذه الأعمال يماثل ما تفعله هوليوود.
الاقتراح طرحه عمرو سلامة عبر حسابه بموقع الفيس بوك عبر منشور طويل قال فيه: إعمل تجربة وإسأل أي طفل أو مراهق تحت العشرين لو يعرف اسماعيل يس، عبد السلام النابلسي، شادية، فايزة أحمد، لو سمع أغاني عبد الحليم وأم كلثوم، أو لو شاف اشاعة حب أو غروب وشروق.
تابع قائلا: الحزين إن بنسة تسعين في المية على الأقل الجيل الجديد مش هيعرف كل دول، لإن إحنا كجيل ماكنش عندنا إختيارات، اللي هيتعرض على القناة الأولى والثانية هو اللي مضطرين نشوفه يا إما هنضطر نقوم نذاكر، علشان كده كنا نعرف الأجيال الأقدم حتى لو ماحضرناهمش.
أضاف: الجيل الجديد مش مضطر يشوف حاجة، عنده مكتبات مكتظة من محتوى محلي وعالمي، بيشوف اللي بيختار يشوفه، مش اللي معروض قدامه، واللي نفسه يشوفه على بعد دوسة أو دوستين، ليه يفتح فيلم قديم أبيض وإسود، أو يسمع أغنية نص ساعة؟
وواصل قائلا: على قد ما ده شيء حزين إن التاريخ ده مش معروف للأجيال الجديدة، على قد ما في فرصة ذهبية لصنع الأعمال ديه ثاني، لجيل مايعرفهمش، زي ما بيحصل برة طول الوقت "Remakes" يعني أنا شخصيا ماشوفتش "Ocean Eleven" الأصلي، ولا "planet of the apes" الأصلي ولا "كينج كونج" الأصلي وهكذا، - لإن برنامج نادي السينما على القناة الثانية ماجبهمش - وصعب أشوفهم برا نطاق زمنهم كأفلام تجارية.
وتابع قائلا: أنا شخصيا عندي أفلام مصري كثير بحبها شايف إنها تتعمل ثاني النهاردة بمعالجات عصرية، ولو كل صانع سينما دور هيلاقي أفلام تحمسه لإعادة صنعها، وهيكتشف إنه مثلا لو عمل معبودة الجماهير النهاردة، مافيش شاب تحت العشرين تقريبا هيكون شاف الأصلي، زي بالظبط ما حصل في “A star is born" اللي بالمناسبة اتعمل كذا مرة.
وقال: يمكن في كذا تجربة حصلت في مصر بس كانت معظمها مقتصرة على تحويل أفلام قديمة لمسلسلات، أو تحويل أعمال إذاعية لتليفزيونية، وبعض التجارب ديه نجحت جدا.
وواصل بقوله: وبعيدا عن الأصوات اللي هتقول "حرام تبوظوا التراث وتشوهوه" حتى في حالة الفشل، المقارنة ديه هتعمل جدل ونقاش يخلي الأجيال الجديدة تستفز تشوف وتقارن، وده أكيد أحسن من إن الأعمال ديه تتنسي للأبد.
واختتم اقتراحه: إحنا عندنا كنز ضخم متاح يتعمله "remakes"، وأعتقد ده لو اتعمل بضمير وباحترام العمل الأصلي يكون بشكل ما بيكرم العمل الأصلي ويكون وسيلة تحفز الأجيال الجديدة يكتشفوا درر وكلاسيكيات السينما المصرية.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
