ظهر المطرب والملحن رامي جمال لأول مرة برفقة المطرب المغمور أحمد سالم المعروف إعلامياً بـ"المطرب النقاش"، للتأكيد على بدء خطوة تبنيه فنياً؛ بإنتاج ديو يجمعهما أولاً، وأغنية منفردة له، وأشار رامي للمرة الثانية إلى أنه لم يقصد تصدر الترند باستغلال الموهبة الشابة، كما نفى وجود أي نية لتوقيع عقد لاحتكار الصوت الذي نجح في خطف قلوب رواد مواقع التواصل الاجتماعي مؤخراً.
وقال جمال في مقطع فيديو تم نشره عبر حسابه الرسمي على موقع إنستغرام: "أنا منورني النهارده الفنان أحمد سالم، علشان بس الناس اللي كانت فاكرة إن إحنا بنضيع وقت، مفيش وقت هيضيع، أنا لسه راجع من السعودية امبارح، بأمر الله تلات أربع أيام هنسمع أغاني من أهم ناس في مصر بأمر الله عشان نختار الأغنيتين، الأغنية بتاعتي أنا وأحمد، والأغنية بتاعته هو لوحده".
أضاف: "إن شاء الله نلاقي الأغنيتين اللي إحنا محتاجينهم في أسرع وقت، وبأمر الله الوعد اللي أنا وعدته ميمنعنيش عنه غير إن عمري يخلص، وأنا ممكن أوصي الناس في المكتب لو عمري خلص يكملوا هم".
وتابع: "أنا بطمن الناس كلها، أحمد بأمر الله هيعمل الأغنيتين، وهتستمتعوا بحلاوة صوته، وبقول للناس كلها اللي عايزين أحمد في حاجة، أحمد مضى مع إدارة شركة أعمال، أي حد هيتواصل مع أحمد هيديله رقم الشركة، وأنا في الأغنيتين اللي بعملهم مش عايز منه أي حاجة، ولا عمري همضي أحمد عقود احتكار ولا الحاجات دي خالص، لأن اللي بعمله لأحمد واضح إن ربنا كتبله القبول، فأنا هفرح إني هكون بنفذ التساهيل اللي بتحصل لأحمد".
وسبق أن كشف رامي جمال عن السبب الحقيقي وراء دعمه لموهبة أحمد سالم، صاحب الفيديو المتداول على مواقع التواصل الاجتماعي، مؤكداً أن الهدف ليس الترند كما يروج البعض، وإنما مساعدة الفن وعالم الغناء وفتح الباب لمواهب جديدة والارتقاء بالذوق العام، لافتاً إلى أن هذه الأسباب ستحقق مكاسب لكل المهتمين بالفن الحقيقي.
ونشر رامي جمال فيديو عبر حسابه الشخصي بإنستغرام للرد على كل ما تردد من شائعات وأنباء حول أسباب حماسه لإنتاج أغنية للمطرب المغمور، وقال: "عايز أتكلم عن القبول اللي ربنا كتبه للفنان أحمد سالم، أحمد فنان بدرجة مشفتهاش في حياتي غير مرتين تلاتة، أحمد أنا شايف القبول اللي ربنا كتبه والحب اللي انتوا حبيتوا ليه فرحان جداً إن مازال الصوت الحلو والفن الحقيقي الناس بتحبه وبتدعمه".
وأضاف رامي جمال: "في ناس كتير وفرحانة إني بساعد أحمد أنا مش بساعد أحمد، أنا بساعد نفسي كفنان وملحن ومطرب، والوسط الفني لما يبقى فيه فنانين زي أحمد بترتقي بالذوق العام ودي حاجة محتاجينها كلنا".
واستكمل جمال حديثه: "واتعلمت في بيت أهلي إن الفرصة لما بتيجي لحد بتبان إن ربنا اللي بعتاها، وممكن أنا أحاول أسهل على أحمد مشواره في الفن، ودي حاجة تخليني في قمة سعادتي، وفي ناس بعتت تقولي إنت بتساعد أحمد عشان التريند، دي مش شخصيتي ولا هتكون شخصيتي، اللي بعتولي كده أكيد موهوبين كل واحد جاي له فرصة، فرصكوا كلها جاية، وأحمد غنى هو بيشتغل، رجل نقي بعد سنة ونص والفيديو ينتشر جداً".
واختتم رامي جمال حديثه: "ربنا يديكوا أكتر من اللي اتمنيتوا زي ما ربنا وقفني لأحمد ووقف ناس ليا زمان، هيوقف لكم ناس، ورزقكم له معاد، ولو ربنا كرمني في موضوع أحمد، دي حاجة هتشجعنا كفنانين، أنا سعيد إني شايف إن في ناس بتحب الفن الحقيقي، لو طلع لنا 15 صوت زي أحمد إحنا اللي مستفيدين، وبقول لكل الناس شكراً على اللي عملتوه مع أحمد، وأنا بالنسبة لي معملتش حاجة معاه خالص لسه، أنا مش بعمل لأحمد، عمل لنفسي عند ربنا، محدش هياخد رزقي، اللي بيسهل لحد حاجة هلاقي مليون واحد يسهلي حاجات تانية، ربتا يكتب له الخير، وإن شاء الله الفترة الجاية يبقى في مفاجآت كتير، وبقول لأحمد كفاية برامج لحد ما نخلص الأغاني".
ودعمت المطربة ساندي قرار رامي جمال، بتعليق قالت فيه: "إنت جميل يا رامي طول عمرك يا صديق الـ ٢٠ سنة طول عمرك بتحب الخير لغيرك وربنا هيوفقك لأن نيتك خير، ده شيء كلنا واثقين فيه، هو فعلاً موهبة تستحق الدعم، أنا لسه سامعة صوته من شوية حقيقي ما شاء الله".
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
