قالت الفنانة سماح أنور، إنها امتنعت تماماً عن شرب المياه الطبيعية منذ 17 عاماً بسبب احتوائها على لون ورائحة، وتأثيرها بالسلب على صحتها، مؤكدة أنها تقوم بتعويض هذا النقص بتناول الفاكهة والخضروات وشرب المياه الغازية بدون سكر، أو تناول مشروبات ساخنة بشرط ان تقوم بغلي المياه للتخلص من أي ميكروبات.
وأضافت خلال لقائها ببرنامج "كلام الناس" على شاشة "mbc مصر": لما باخد بق ميّه جسمي بيضايق وبطني توجعني، وأنا بتجاوب مع جسمي وأشعر بما يؤلمه، ولازم أوضح أنني لست طبيبة ولا متخصصة، وهذا نظامي الخاص وقد يكون شديد الضرر بالآخرين.
وتابعت: إحنا مش لازم نشرب المياه بالفم.. أنا بأكل المياه كتير.. وده من خلال الفواكه والخضروات.. جسمي بياخد الكمية اللي محتاجها من خلالها.
وأكملت: اللي بيشرب مياه طول الوقت أصيبوا بأمراض على المدى البعيد على الأقل.
وتحدثت سماح أنور عن سبب ابتعادها عن الزواج والعلاقات العاطفية، مشيرة إلى أنها سعيدة في حياتها وهي وحيدة، وقالت: أنا مستمتعة لوحدي وأنا في سن مش بتاع حب، وبعدين لسه هقوم أحط ميكب وألبس وأنزل ونسهر ونرجع طب وشغلي وبكون عايزة أنام؟ وأنا من الناس الكسولة واتعودت على البيت ومش بحب أخرج إلا إذا كان عندي شغل.
وواصلت سماح أنور: اتعودت أبقى لوحدي وبقى دا نظام حياتي ودي جنتي والحياة المثالية ليا، ومفيش راجل فيها ومش بدور على الحب؛ لأنه عايز تفكير ولو حبيت هفكر هل بعد مرور 5 سنين هندم؟ هل هكون مبسوطة على المدى البعيد؟ والحياة العاطفية مش أولوية طول عمري لأني بقع في الحب وبتكون زي الحادثة.
وأضافت سماح أنور: عمري ما قولت عايزة أتجوز وبدور على حد، وممكن تحصل بدون ترتيب، وحبيت مرة واحدة في حياتي ومكنتش لطيفة والست لما بتحب بتقع على وشها ودا بيطفش الرجالة، وأنا مش بعرف أتقل وأتحكم وبقعد باصه للتليفون مستنياه يتصل بيا.. وبالتالي اقتنعت إني لا أصلح للعلاقات العاطفية.
وقالت سماح أنور، إنها لم تقدم أي شخصية تمثلها بشكل شخصي طوال مسيرتها الفنية، مؤكدة أنها لا تنزعج من نقد أفلامها أو من سؤال الجمهور عن تشبهها بالرجال في أعمالها، واضافت قائلة: الناس بتسألني هو إنتي ليه مسترجلة؟ هو ده اللبس.. الناس لما بتتفرج على عمل بتفتكر إن الممثل عامل كده في الحقيقة، أنا مفيش دور عملته بيمثلني لغاية دلوقتي خالص ومش هعمل كده، أنا بحب الاختلاف مع إني كسولة ولكن عندي أحلام وأفكار محدش بيفكر فيها كتير، بحب أشتغل على نفسي وبحب أخدم سماح أكتر، لأني مؤمنة إن محدش هيعرف يخدمك قد نفسك ولا هيعرف إمكانياتك قدك، مساندة الواحد لنفسه أهم من مساندة الناس.
تابعت: أنا اخترت أكون ممثلة، مينفعش يكون ده اختياري وأزعل من آراء الناس، أنا هتضايق لو الموضوع شخصي، ولكن دي مهنتي وده مش أنا، واللي بينقد دور أنا بستفيد منه كممثلة، واللي بيقول دي سماح مسترجلة بفرح أوي لأنه صدق الدور.
واستكملت سماح أنور حديثها قائلة: هو مسترجلة يعني إيه بحلق دقني الصبح؟ تفسير الكلمة نفسها أنا مش فهماه، أنا ست رياضية وبحب السينما المختلفة.
أما عن رفضها التعليق على الشائعات المتعلقة بنجلها، فقالت: أنا بحس إن الكلام في حياتي الشخصية عيب ودي قلة قيمة، لأن أنا سمعت الكلام ده في البيت، وبحس إنه علم لا ينفع وجهل لا يضر، هل هتنفعك المعلومة دي في حياتك أو هتنفعك في حاجة؟ أنا مش عايزة أرد علشان دي حاجة تخصني، وعيب أوي إن حد يسأل حد عن حاجة شخصية.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
