نفت الفنانة ميار الببلاوي، تعمد الإساءة لزميلها الفنان أحمد رزق، وبنفس الوقت قالت إن "قلبه أسود" لأنه يرفض أن يصالحها منذ سنوات طويلة، بعدما تسببت وشاية في الوقيعة بينهما، وأشارت إلى أن الواقعة الأصلية للخلاف بينهما ليست مقصودة وأن الأمر كله ما هو إلا سوء فهم.
وقالت ميار الببلاوي، خلال حوارها في برنامج قعدة ستات المذاع على قناة "القاهرة اليوم" ومن تقديم الإعلامية مروة صبري،: أنا عاتبت أحمد رزق وقُلت له إنت قلبك إسود يا أحمد مش بتصالحني ليه؟، والموضوع بدأ إني كنت في مرة بتطلق والوقت ده كان انفصال حنان مطاوع عن أحمد رزق بعد ما كانوا مخطوبين، فأنا لقيت واحدة منزلة صورة حنان وخطيبها وكاتبة عليها أتقل تاخد حاجة نضيفة، وأنا نشرت الصورة عندي من غير قصد، والله ما كنت أقصد أحمد وهو حبيب قلبي، وكان أول مرة يشتغل في حياته كان في مسلسل بتاعي كان لسه جديد.
وأضافت: أنا عارفة كويس إن مستحيل أغلط في أحمد، والصورة اللي نشرتها كان الغرض منها إني ألقح على الشخص اللي انفصلت عنه، ولكن الصحافيين خدوها وبعتوها لأحمد رزق، وقالوا إني بقول عليه كده، وبعت لأحمد على الواتساب مردش عليا خالص، ولغاية دلوقتي مخاصمني.
واختتمت ميار الببلاوي حديثها قائلة: أنا مشكلتي فعلًا إن لساني متبري مني، وبتكلم باللي في قلبي جداً وبفترض في اللي قدامي إنه يكون فاهم، وعمري ما كنت غلاطة حاشا لله، ومفيش بيني وبين أي حد من أصدقائي من الوسط الفني الجيل بتاع زمان ودلوقتي.
وسبق أن تقدمت ميار الببلاوي بشكوى علنية إلى نقيب المهن التمثيلية الدكتور أشرف زكي، للتصدي لمن يروج داخل الوسط الفني شائعة اعتزالها التمثيل، وقالت عبر بث مباشر بالفيديو إنها كانت مرشحة للمشاركة ببطولة عمل درامي شهير، وعلمت أن أحدهم ادعى اعتزالها الفن ما تسبب في استبعادها، ووصفت ما حدث بأنه "قطع أرزاق" وأشارت إلى أن حجابها لن يمنعها من تجسيد أي شخصية درامية "بما يرضي الله".
وقالت ميار الببلاوي عبر حسابها الشخصي بموقع الفيس بوك: النهارده عرفت إني كنت مترشحة لمسلسل من المسلسلات اللي نفسي اشتغل فيها، لأنه مسلسل حلو، وبيتكلم عن حاجة كويسة، نفسي تبقى رسالة مني للناس، مش عايزه أجيب اسم المسلسل، لكن كفاية تعرفوا إني من الناس الأبطال اللي مترشحة للمسلسل".
وأضافت: "والناس كانوا مرحبين، وقالوا كلموا ميار الببلاوي، عشان تقولوها على الترشيح، طلع واحد، معرفش إيه موقعه من الإعراب؟، قالهم ميار الببلاوي، إنتوا متعرفوش ولا إيه؟، قالوا له مالها، الدور لايق عليها، ولايق على إنها لابسة الحجاب، قالهم لأ، دي اعتزلت، ومبتمثلش، وبعدين دي بتعمل برنامج ديني، وهتقعد تقولكم قال الله وقال الرسول، أنا مش فاهمة أنا هقرفهم ليه؟، ومالي إنا قولت قال الله وقال الرسول في الموضوع".
واستكملت: "وبعدين دي أرزاق، إنت هتستفيد إيه، لما تقطع رزقي في حاجة؟، يعني أنا أعرف كويس اشتغل شغلي، من غير ما أجي جنب حجابي وجنب ديني، ولا أزهق الناس، يعني خلاص ادعوا إلى سبيل ربك بالحكمة والموعظة الحسنة، وبعدين تقعد تقول دي بتعمل برنامج ديني، معقولة هتمثل وهي بتعمل برنامج ديني، إنت ميخصكش بقى، أنا يتعرض عليا الدور، أقبله مقبلوش، لكن إنت داير في كل حتة تقول، ميار الببلاوي اعتزلت، وبعدين ألاقي بيكتبوا الفنانة المعتزلة، يا جماعة معتزلتش، حرام عليكوا توقفوا حال الناس ورزق الناس".
وواصلت: "وميطلعليش حد يقولي، إنت إيه يا ميار، جرى إيه يا ميار، إحنا كنا بنحترمك إنتي كنتي سبت الفن، أنا لا سبت الفن، ولا عايزه أسيب الفن، أنا ممثلة، ومذيعة، وبعمل كل حاجة بما يرضي الله، وفي النطاق الشرعي، ضوافر مفيش ضوافر، الميكب أنا جايا من تصوير، ابعدوا عني، ابعدوا عن رزقي، ابعدوا عن أكل عيشي أنا وابني، أنا مش معتزلة، ومبحبش الكلمة دي على فكرة، أنا ممثلة محجبة، وأكيد القائمين على الأعمال الفنية عارفين إنهم جايبين ممثلة محجبة".
وطلبت ميار ترشيحها لتجسيد أدوار الأم وقالت: "أنا واحدة داخلة على الـ50 سنة، أكيد وأنا داخلة على الخمسين أطلع دور الأم، أنا عندي شاب مبخبهوش، أنا عايزة أعمل أدوار الأم، أدوار الأم مناسبة جداً لحجابي، واعتقد إن أنا ممثلة مش وحشة، والمسلسلات اللي بتتعرض لي لحد دلوقتي على الفضائيات، ومسلسلاتي الأخيرة، بتقول إني ممثلة كويسة، ليه إنت لما اترشح لمسلسل، تقول إني معتزلة، إنت جبت الكلمة دي منين؟، الكلمة دي مضايقاني جداً، وبعدين يقولوا إيه؟، الله إنت عايزة تشتغلي في رمضان، إنت مش قولتي الشغل في رمضان حرام، أيوه، أنا مش هصور في رمضان، أعتقد إن شاء الله، مصورش في رمضان، عشان ميبعدنيش عن التراويح أو التهجد أو العمرة، بس لو هنصور مسلسل دلوقتي وهيتعرض وبيقول كلمة حلوة لله وبيحط سبوت على فترة مهمة في التاريخ، ليه لا؟، هي الفلوس اللي هاخدها مش حرام لإن المسلسل بيقول حاجة، وبعدين طالعة بحجابي وباحترامي وبسني، حرام عليكوا تاريخي ده كله".
لمشاهدة أجمل صور المشاهير زوروا «إنستغرام سيدتي»
وللاطلاع على فيديوغراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
