كشفت الفنانة كارمن سليمان عن الكثير من أسرار طفولتها وحياتها الشخصية، وكيف تأثر مشوارها الفني بالزواج المبكر، وتأثرت بشدة أثناء الحديث عن تحملها مسئولية إدارة أعمالها بعد انتهاء مهمة والدها ومن بعده زوجها الملحن مصطفى جاد، وقالت: كل الناس سابتني لوحدي.
أضافت كارمن سليمان أثناء حلولها ضيفة على أنس بوخش في برنامج abtalks المذاع عبر يوتيوب: أنا كنت متعودة من وأنا صغيرة وبعد التحاقي ببرنامج آرب أيدول إن في حد ماسكلي شغلي ديما، وبيتفق مع الناس وبيعمل كل حاجة، والشخص ده كان بابا، وبعد بابا كان زوجي مصطفى جاد.
تابعت قائلة: لكن في وقت جه مصطفى وقالي احنا كبرنا خلاص والمفروض تنزلي الاستديوهات وتتابعي شغلك بنفسك، ونشوف مدير أعمال ليكي علشان أبدأ أشوف شغلي أنا كمان، وفعلا أنا قبلها ماكنتش بحضر الأغاني بتاعتي وهي بتتعمل في الاستديوهات، ومصطفى وقبلها بابا هما اللي كانوا بيتولوا كل ده، وأنا لما نزلت وشوفت الاستديوهات وحضرت صناعة الأغاني كان الموضوع غريب جدا بالنسبالي في منتهى الغرابة لأني أنا مش دارسة مزيكا ومش فاهمة وكله كان كده بالحب يعني، وكنت وقتها عملت شوط كبير، وكانت كل دي أغاني أنا مغنياها بس ومعرفش حاجة فيها غير إني غنيت.
وبصوت باكي تحدثت كارمن سليمان عن وضعها الحالي في مجال الغناء والوسط الفني، قائلة إنه أصبحت أكثر تحملا للمسئولية وتتعامل مع تحديات كثيرة بمفردهما موضحة:" حاسة بصعوبة في المجال.. ومحتارة بس مش زعلانة.. كل الناس سابتني لوحدي".
ورغم زواجها من مصطفى جاد في سن مبكر بعمر 22 عاما، نصحت كارمن سليمان الجميع بعدم الزواج المبكر وقالت: لا أؤيد الزواج المبكر بشكل عام، فسن 26 أو 27 بالنسبة لزواج البنات حلو جدًا والراجل مش قبل 30 سنة، أنا حمد الله اختياري من الأول في زواج كان تمام، وفي الآخر الزواج قدر.
وتابعت:كل الحاجات اللي معملتهاش قبل الجواز ممكن أعملها دلوقتي بس هحس أن فيه حاجة ورايا بردو، والزواج في سن بدري خلاني أحس أن فيه حاجات كان لازم أعملها لوحدي زي السفر.
وحول اتهامها بالغرور بعد فوزها بلقب "أراب أيدول" في موسمه الأول أكدت كارمن سليمان إنها كانت في بداياتها مع الوسط الفني، والشهرة، لا تتحمل فكرة رغبة الجمهور في التقاط الصور معها حتى إذا كانت في حالة مزاجية سيئة، وكان حبهم لها تحول من نعمة لنقمة.
أضافت كارمن سليمان: أنا ضريبة الشهرة دفعتها إني بقيت خلاص بفصل بين حياتي في البيت والشغل، وبقيت أوافق اتصور مع الناس في أي وقت، ولما بكون في أي حالة، لأن خلاص الناس مالهاش علاقة أنا بمر بإيه في حياتي.
وتابعت: أنا في البداية الناس كانت بتقول عليا مغرورة لأني أحيانًا كنت برفض الصور، عشان مش قادرة ابتسم، لكن بعد كدا حسيت إن دا مش صح وبقيت أعرف أفصل بشكل كويس، عشان حب الناس اللي كان مشكتلي في الأول اكتشفت إنه حاجة مهمة جدًا وبيحفزني دائمًا.
وكشفت كارمن العديد من الأسرار الخاصة بحياتها، والمشكلة التي تراها من أكبر عيوبها وهي العصبية، مشيرةً أنها تحاول أن تبدو هادئة أمام نجلها لأطول وقت كي لا يكون مثلها ولا يعتاد أن العصبية هي شئ طبيعي.
وتحدثت عن انفصال والديها الذي تم مؤخرا، وقالت كارمن سليمان إن والديها عرضوا عليها فكرة الانفصال قبل إتمامها وإنها وافقت، لأن الحياة بينهما كانت صعبة في الفترة الأخيرة، واشارت إلى أن علاقتها بهما جيدة حتى الآن.
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
