كشفت الفنانة يسرا عن سلبيات وإيجابيات الأضواء والشهرة، مؤكدة أن بعض نجوم الفن يسيئون استغلالها، كما أن مواقع التواصل الاجتماعي تتعمد تصوير النجوم بصورة سلبية مع إبراز أي خطأ يرتكبونه، وينسون أن الفنان إنسان قبل أي شيء ومعرض دوماً لارتكاب أخطاء.
وواصلت يسرا خلال لقائها في برنامج abtalks مع الإعلامي الإماراتي أنس بوخش: لو حد بيسعى للشهرة فقط هيقدر يحققها في ثانية بدون مجهود، ولكنها عمرها ما هتدوم لأنك لازم تشتغل بـجهد وتحب مهنتك مش الشهرة، ولازم تحترم اللي بتعمله عشان يقدر يمنحك شيئاً جميلاً ويترد ليك، ولازم تعرف إزاي تستخدم الشهرة في الشيء الصح وأنك تخدم المجتمع مش عشان النجاح ولا الفلوس، ولازم تتجنب الجزء السيء من الشهرة، وفي النهاية مش هنقدر نرضي الجميع والمشكلة أن الجمهور بينسى أننا بشر.
وأضافت يسرا: الشهرة دين في رقبتنا ومسئولية كبيرة، فيه ناس قد الشهرة وفيه ناس مش قدها ولما الشهرة بتيجي لهم بيفهموها وفيه ناس لما تجيلهم بتلغبطهم وتجننهم، وأحياناً بكون مُنهكة من الشهرة والناس وبفصل عن العالم تماماً، وأقعد في البيت لوحدي وبدخل في حالة خاصة بيا زي القوقعة وبنعزل، ومن هنا بقدر أشحن طاقتي من جديد وأكمل إنما مقدرش أستمر على طول بدون ما أبتعد فترة للاستراحة.
وتحدثت يسرا عن الفارق بين عالم الشهرة في الوطن العربي والشهرة في هوليوود، قائلة: العالم في هوليوود أصعب بكتير من عالمنا؛ لأنهم شغالين بسرعة وكأنهم آلة، وبيتسنزفوا من طاقتهم ومش سهل تكون نجم كويس برا، لكن هنا إحنا بيحترمونا ويحبونا والناس بيكبروا معانا، إحنا أرحم كتير.
وكشفت يسرا سلبيات السوشيال ميديا والتدخل في حياة الفنانين، مشيرة إلى أن الجمهور يحكم على المشاهير دائماً دون معرفة التفاصيل.
وقالت يسرا: الناس بتحكم على الفنان 24 ساعة وبيطلعونا شياطين على السوشيال ميديا ويصححوا أفعالنا، والجمهور بيغزو حياتنا لدرجة إني بتعب ومبقدرش أبتسم أحياناً؛ لأننا عندنا ضغوطات ومش سعداء دايماً، وقبل السوشيال ميديا مكنش حد بينتقد فنانة عشان لبست بيكيني وكان عندنا حرية وخصوصية.
وواصلت يسرا: إحنا كنا أسعد وعندنا حرية ووقت خاص لينا ومحدش بيقتحم خصوصيتنا قبل ظهور السوشيال ميديا، ومكنش حد بيحكم علينا وبقينا نتعرض لانتقاد أكتر حالياً، عكس من 40 سنة وبدأت أعاني من السوشيال ميديا، لدرجة الناس بيصورونا وإحنا بناكل وينشروها على السوشيال ميديا، ليه بتصورونا وإحنا بناكل؟ سيبونا في حالنا ليه بتقتحم خصوصيتي كدا؟
وأضافت يسرا: فيه اللي بيقتص الكلام وياخد كلمتين ملهمش علاقة باللي بقوله وينشرهم، ودا ميصحش على الأقل بالنسبة لآداب السلوك والأخلاقيات ودي ملهاش علاقة الشخص متعلم ولا لا، ولكنها الطبيعة الإنسانية، مثلا لو لقيت شخص أكبر مني سناً ومش لاقي مكان يقعد هقف له لأني اتعلمت دا في المدرسة.
واختتمت يسرا، حديثها، قائلة: في النهاية أنا اخترت الشهرة ولازم أتحمل عيوبها ومينفعش ألوم حد؛ لأني بحب اللي بعمله وبحترمه وأنا مدينة للناس اللي بيحبوني ولكن بقول لهم سيبولي وقت عشان أقدر أكمل والمفروض يكون فيه تقدير للخصوصية أكتر زي ما أنا بقدر حبهم.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوغراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
