كشفت الفنانة نهى عابدين عن سر نجاح مسلسل «تحت الوصاية» رغم تعرضه لهجوم شديد، قبل عرضه في النصف الثاني من موسم المسلسلات المصرية لرمضان 2023، وقالت «المسلسل جه على الوجع»، وأوضحت «إن الستات مظلومين في كتير من حقوقهم».
وتابعت الفنانة نهى عابدين، خلال استضافتها في برنامج الستات ما يعرفوش يكدبوا على قناة «CBC»: «الستات مظلومين، وصعب اللي بيحصل فيهم مش بس في مسلسل تحت الوصاية، وفي كل المجتمعات العربية، ومسلسل تحت الوصاية جه على الوجع، ومش بياخدوا أبسط حقوقهم».
وتابعت نهى عابدين حديثها عن التعاون مع الفنانة منى زكي، إذ قالت: «نفسي أعمل دور مختلف حلو ويضيف لي، ويكون عمل فني مهم، وكان نفسي أشتغل قدام منى زكي، استفدت منها الالتزام، وكنت عايزة أتعلم منها، وهي بتحترم المخرج مهما كانت نجوميتها، ومش متسلطة، وبتسمع كل واحد في الكواليس، مش بيهمها شكلها، أهم حاجة عندها إن هي تعمل الدور، وعندها ثقة في نفسها، وبسيطة جداً، ولسه عندها شغف في التمثيل، وبتدخل اللوكيشن بتبقى متوترة ومرعوبة».
وواصلت نهى عابدين في حديثها عن أبرز أدوارها، قائلة: «عملت دور في ونوس، وحلاوة الدنيا، بعدها عرفت إني مسكت الطريق، وعملت حاجات بسيطة بس كانت عادية، ومساحة الأدوار كانت أكبر، والأدوار كان مركبة ومعقدة، والموضوع مش مساحة بس، والدورين دول مساحة وادوني مساحة أطلع التمثيل اللي عندي، ومش ضد ولا مع 15 أو 30 حلقة، طالما يتواجد إيقاع وأحداث، ومش بعدد الحلقات، الورق أهم حاجة».
وعن سبب اعتزالها الفن، قالت نهى عابدين: «سبت نفسي في الاكتئاب وعملت كل حاجة، جبت قاع الاكتئاب، سيبي وقتك للحزن، قعدت مع نفسي في عزلة، وتجربة الاكتئاب خليتني أكتشف حاجة في نفسي، لما قعدت مع نفسي اكتشفت إني بدمر نفسي واللي بعمله مينفعش، وابتديت إني أقوم وروحت لدكتور نفسي، ولازم كل فترة كبني آدمين نروح لدكتور نفساني؛ أعمل تنظيف وصيانة لنفسي».
وتابعت: «أنا شخص حمول أوي وعاطفية، لما تتواجد عندي تراكمات، ببقى عايزة أختفي، وكنت عايزة أعتزل وأهاجر، البني آدم حياته عبارة عن دوائر ومتصلة ببعض، ولو في دائرة فيها خلل هيأثر على الباقي، والممثل يجب أن يفصل قدام الكاميرا بس، في الآخر إحنا بني آدمين، وعندي جهاز عصبي واحد، وكل الحاجات دي بتخلي الفنان يكون قدرته التمثيلية».
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
