تقمّص المطرب تامر حسني دور خبراء التنمية البشرية عبر صفحته الموثقة على موقع الفيس بوك، مؤكدًا أنّ أحد مشاهده في فيلم "البدلة"، دفعه لطرح أسئلة عدة على الشباب، في ما يتعلق بالإحباط من المحسوبيات واليأس من الغد، وأزمات أصدقاء السوء، والطاقة السلبية المنتشرة حاليًّا في مصر، وقدّم العلاج من واقع تجربته كفنان بدأ مسيرته من "تحت تحت الصفر" كما قال.
تامر طرح القضية بالأمس عبر منشور قصير موجه لكل متابعيه، طالبًا منهم إبداء الرأي قائلًا: صباح الهنا على أغلى ناس على قلبي، أنا كنت بحضر مشاهد داخل أصوّرها في فيلم البدلة اليومين دول، بس لفت نظري كلام مهم أوي في الحوار، فكلكم جيتوا في بالي، وبدأت افكر فيكوا إنتوا وحسيت إني عايز اسألكم سؤال، وممكن نتناقش فيه شوية من خلال الصفحة لكل حد فيكم، السؤال هو في ظل المحسوبيات وأصدقاء السوء والتشوهات الفكرية والطاقة السلبية الرهيبة في بلادنا، وحاجات تانية جوّة، كل حد فيكم أكيد في ناس كتير محبطة، ونفسها تنجح بس هل حد فيكم بدأ يحط حلول عشان ينجح، وإيه هي الحلول والّا في منكم مفيش حلول بالنسبة له؟
المفاجأة أنّ تامر اطّلع على كل الردود وقدّم خلاصة أفكاره في منشور مطول فجر اليوم الاثنين، قال فيه: بشكل عام حاولت اقرأ معظم التعليقات، ومن خلال مشواري المليء بالإحباطات والنجاحات والحمد لله على كل حال، وتجربة حياتي اللي هيّ كتاب مفتوح ليكم، ومن منطلق صعودي كشاب فكّر واجتهد واتحدّى كل السلبيات دي وظروفه صعبة جدًّا، وبدأ من تحت تحت الصفر، خلونا نتفق انّ بلادنا فيها كل ما يُحبط، طب هنعمل إيه نقعد نلطم مثلًا ونسلّم نفسنا للفشل ونجاري كل ما هو سلبي ؟!!
تابع قائلًا: أكيد لأ أولًا تعالوا نتفق انّ بر الوالدين حتمية، وأن رغم أيّ أخطاء لازم قلبك يكون متعلّق بربّنا، أساس لا غنى عنه وفي المقدمة، ثانيًا لازم نقول لنفسنا مش في ناس نجحت من غير واسطة وظروفهم كانت صعبه جدًّا ووصلوا لأعلى المراكز، يبقى خلاص الأمل موجود لكل شخص فينا ومنفضلش نقول ظروف ظروف، ومش بنسعى ولا بنشتغل ولا بنفكر ولا بنطور من نفسنا، يا جماعة خلوا قدامكوا جملة ( ما فلان ظروفه كانت أصعب مني ووصل )
أضاف: المهم ناخد بالنا من حاجة مهمة أوي (الوقت) (الوقت) ( الوقت ) بيصعب عليّا جدًّا بعض الشباب والبنات اللي حياتهم بقت على الإنترنت ويا ريتو استخدام إيجابي، لأ ده استخدام في منتهى السلبية في النميمة والشائعات على الناس، وتصنيف الناس ومحاسبة الناس، ومين راح ومين جه ومين اتجوزت ومين خسّت، أُقسم بالله حرام الوقت ده كله يروح على كده ..
وواصل نصائحه قائلًا: شايف ناس بتقول سبب إحباطهم أصحابهم سيبوهم فورًا مفيش وقت، واتعلّموا مش أي رأي أو كلمة تحبطكوا، اعملوا صحاب جداد يحبولكم الخير .. وبالنسبة للفشل عادي إنك تفشل بس لازم تتعلم من فشلك، وعادي تحاول وتفشل تاني وتالت وتخطأ وتفكر غلط، وبعدين تتعلم من اخطاءك، فاتفكر صح وعادي إنك يتضحك عليك ويتنصب عليك، بس اكيد هتتعلم، الدنيا مليانة ناس متتقلعش من رجلك، بس برضو في ناس لسه بخير، آه هما قليلين بصراحه بس موجودين.
تابع: أما فكرة السفر أنا شخصيًّا أحب أن كل ولاد البلد ينجحوا فيها، بس ده موضوع نسبي وحسب عقلية وثقافة وظروف كل حد، فلو عندك طموح تشتغل برة مش عيب، ياما ناس سافرت نجحت ورجعت نفعت بلدها، ورفعت من قدرها وفرحت أهاليها، بس حسبتها صح واتعاملت مع ناس صح ورجعت هنا برضو.
أضاف: أما عقدة جراح الماضي الأليم متخليهاش تعطّلك بلاش تبص وراك اللي عدّا عدّا، خلاص أساس أي برج عالي طوب واسمنت ورمل، بس في النهاية بقى برج عالي شكله جميل عمرك شفت متسابق في سباق، وهو بيجري بيبص وراه اكيد لأ عشان حاطت هدف أدامه وشايفه انت كمان لازم تحدد انت عايز إيه، وتسعى صح عشان في ناس بيسعوا بس بيسعوا غلط ومتضحكش على نفسك.
وقال: كان نفسي وانا صغيّر أكون لاعب كورة، وحاولت بس مش نصيبي فدوّرت على طول على حلم تاني وفضلت وراه . شوف عيوبك وواجه وابعد عنها وطوّر من نفسك وفعلًا ابدأ بنفسك في التغيّر، ده مش كلام وشعارات دي كلمة مهمة جدًّا فعلًا، وسرّ كبير من أسرار النجاح خلّيك في حالك في نفسك في شغلك اشغل نفسك بفكرة.
ووجه النصيحة لنفسه قائلًا: أنا هفضل اسعى لحدّ ما ربنا يكرمني واوصل لحلمي، أنا كل يوم عندي مشوار لحلمي، أنا من النهارده هقدّر قيمة ونعمة الوقت اللي لازم استغله في أهم الحجات، ولازم افكني تمامًا من الغوص في حياة الناس من خلال جميع الوسائل اللي هتخطف عمر البني آدم من غير مايحس، واقول لنفسي انا مالي وتخليك في شغلك هتفضل مشغول بالناس، والناس بتنجح وبتكبر من جانبك وقتك أولًا بيك حتى حبك للأشخاص والأخبار خليه يشدك للإيجابيات، عشان الطاقة اللي هتخرّجها أيًّا كانت بترجعلك تاني، أنا آسف طولت أوي بس ربنا يعلم ان اللي في قلبي ليكوا، مش أغاني وأفلام وبس، وكمان الحب اللي بشوفوا منكوا بيخلّيني عايز افيدكم بأي تجربة مريت بيها واكلّمكم عن أسرار كتير فيها.
تامر مر بتجربة صعبة جدًّا حتى يصل إلى النجومية ..فهل تستمعين لنصائحه؟
لمشاهدة أجمل صور المشاهير زوروا أنستغرام سيدتي
