كشف الفنان كريم سرور عن تطور جديد داخل الوسط الفني المصري، لافتا إلى زيادة سطوة المحسوبية و الواسطة، واستغلال أصحاب المواهب الحقيقية والتاريخ الفني، لدعم معدومي الموهبة أشار إلى وجود رغبة في منح هؤلاء النجومية "الزائفة".
كريم كشف ما يحدث عبر حسابه الشخصي بموقع الفيس بوك، في إضافة جديدة لمنشورات نجوم جيل الوسط الفاضحة لتفشي ظاهرة الواسطة والمحسوبية داخل الفن المصري، وقال: الحسابات الفنية داخل الوسط الفني دلوقتي بقت معقدة لدرجة رهيبة.. مستحيل تفهمها فعلاً، المحسوبية و الواسطة اللى بقالهم مليون سنة فى الوسط خدت إتجاه تانى خالص حالياً.
تابع شارحا: يعنى مثلاً اللى طول عمرى فاهمه إن أخو فلان أو بنت فلان أو قريب فلان ده بيدخل من أوسع بوابة للشغلانة و دى حاجة عمرى ما كان عندى فيها مشكلة بجد لإنه مهما كانت واسطته شطارته هى اللى هتخليه يكمل أو يتقاعد بسرعة البرق.. لكن و رغم كل ده مكنش أبداً هييجوا على حساب حد.. يعنى هيبقى الناس اللى ليها تقدير فنى تقديرهم موجود زى ما هو بس الفكرة إنهم هيحشروا البيه أو الأنسة وسطهم.
وواصل قائلا: دلوقتى بقى بيلغوا مجهود أى حد و أى سنين تعب و يمحوا وجود فنان مجتهد داخل يعافر لوحده فى العالم الغامق و قدر يعمل ولو سيرة بسيطة و ضئيلة جداً فى أذهان الجمهور و يعلوا حد ظاهر بقاله ٣ أيام حرفياً.. عشان الواسطة اللعينة و المشكلة الأكبر إن ده بيحصل بشكل تلقائى كأنه طبيعى..
أضاف: المعايير اللى ملهاش معنى دى أصبحت راسخة فى عقولهم.. الواسطة كفيلة تخليك نجم فى ليلة وضحاها بدون مجهود يذكر بل بالعكس ده إنت هتقفز على مجهود و تعب الآخرين بكل بساطة و هيبقى إسمك منور التترات و وصورتك منورة البوسترات و هيحطوك فى كل الدعايا و لا كأنك شادية فى عزها يعنى سواء إنت شاطر أو مش شاطر لو معاك واسطة هنفضل نحشر فى وشك واسمك كل شوية لحد ما الناس تفهم إنه نجم خطير و يلبسوه للأبد.. إنما إنت جى تقولى موهبة و شطارة و إجتهاد !! روح موت ياعم.
واختتم شكواه قائلا: باختصار عشان تستمر فى الشغلانة دى لازم جنب شطارتك وموهبتك تبقى بذكاء التعلب عشان تعرف تواجه كل العبث ده
الفنان عمر الشناوي حفيد الفنان كمال الشناوي حاول إقناع كريم بمسح المنشور وعدم التحدث عن هذه الظاهرة وقال: كريم يا صديقي اعذرني بس ملوش لزوم الكلام ده لانه ولا بيجيب ولا بيودي وزي ما في ناس ممكن من وجهه نظرك او نظر ناس تانيه تبقي مزقوقه او شغاله واسطه في كتير جدا غيرهم داخلوا بمجهودهم وبتعبهم وانت واحد من الامثال دي فمتشغلش بالك من اللي بيحصل لغيرك وركز في مشوارك انت اهم.
ورد عليه كريم سرور: الموضوع زاد عن حده أوى يا عمر ولما يقرب منك و يتجاوزك و يتجاوز حقوقك لأسباب شخصية يبقى لازن ننفث عن غضبنا برضه.. واهو بوست لا هيودى ولا هيجيب انما بينى وبين نفسى عارف انى مكمل عشان انا مؤمن بيا قبل ما حد يؤمن بيا فما بالك وانا حواليا كتير الحمدلله مؤمنين بيا جداً.. ف كله على الله و وحشنى جداً جداً يا عمر.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
