نفت الفنانة رشا سامي العدل صحة ما تردد عن رفض عائلتها خطوتها الأخيرة نحو بيع الوجبات المنزلية عبر سيارة في مدينة دهب السياحية، وقالت إن أعمامها "العدل جروب" أعلنوا فخرهم بها ويدعمون خطوتها، ويحترمون رغبتها في الاعتماد على نفسها والبحث عن "لقمة عيش" بالحلال.
رشا ردت على الشائعات عبر حسابها بموقع الفيس بوك وقالت: اهلي مش معترضين كما يقول البعض بالعكس تماما... احترموا قراري في محاولة الاعتماد على نفسي عقبال باقي الناس لما تقتنع انه و لا عيب و لا حرام ان حد يسعى و يجتهد و يشتغل طالما بيكسب بالحلال ندعي بالتوفيق و باذن الله اكون قدها و اخلي اهلي فخورين بيا.
وسبق أن تدخلت الفنانة نادية شكري لدعم ابنتها رشا سامي العدل في خطوتها الجديدة والرد على عبارات التجريح الموجهة لها ولعائلتها "العدل جروب"، وقالت شكرى: نفسى أقول للناس اللى بتحاول تحبط بنتى وهى بتحاول تعمل مشروع تحس فيه بذاتها وربناما يحوجهاش لأى حد: إنتم إيه مشكلتكم إذا كانت من عيلة كبيرة والا حتى مالهاش عيلة؟ هو الشغل لناس وناس لأ؟ وليه التجريح ؟
أضافت: يعنى أنا مثلا بعد الظروف والتغيرات اللى موجودة فى الوسط الفنى وفنانين وفنانات وشباب قاعدين فى بيوتهم غير أن فيه منهم مد إيده والباقى حيحصلهم لو انا أو غيرى إشتغل أى شغلانة يبقى كداب ومش معقول وفلوسها راحت فين ؟ أصلا وإنتم مالكم ماتعملوا زى الناس الطيبة اللى بتبارك أو بطلوا تعلقوا عشان ماتخدوش ذنوب.
وواصلت نادية شكري الدفاع عن ابنتها قائلة: وبالمناسبة كل يوم ها تسمعوا عن فنان بيشتكى عشان سكتنا كتير على أمل الوضع يتغير ولكنه يتغير إلى الأسوأ، بيبانوا للبعض إما دور صغير أو أجر عيب أصلا يعرضوه عشان الفنان يرفض وهم يبقوا عملوا اللى عليهم فى حين إنهم بيشغلوا نفس الناس فى كل المسلسلات وبإجور مغالى فيها وفيه منهم مع الأسف لا يصلح إن يكون ممثل ولكن العلاقات سواء مع المنتج أو المخرج أو النجم أو مكاتب الكاستينج أو بعض الورش المعروفة هى اللى بتشغل الفنان وغير الفنان للأسف والكلام فى الموضوع ده محتاج صفحات مش وقت الحديث فيه بإستفاضة حاليا، لكن حبيبت تاخدوا فكرة وتعرفوا إننا فى معاناه مادية ونفسية كبيرة واللى زى بنتى وزى انا صعب يلح فى طلبه.
وطلبت نادية شكري من نقابة المهن التمثيلية البحث عن حل لأزمة تفشي العطالة بين نجوم الفن وبخاصة الشباب وقالت:المفروض النقابة تشوف حل مع الجهات المنتجة إحنا بتموت كل ثانية من الإحساس بالظلم والمفروض نقابتنا قوية وأكيد لازم تشوف حل قبل ما نموت بحسرتنا، والحمد لله إن النقابة وقفت معايا فى مرضى لما كان عندى كورونا وتكاليف العلاج والمستشفى ماكناش بتقدر عليه لأننا مش بتشتغل وأكيد لو كنا بتشتغل ماكناش طلبنا مساعدة النقابة لأن أنا شخصيا الموضوع ده بيألمنى مع إنه حقى فيا ريت ترحمونا من التعليقات المستفزة وكفاية اللي الواحد فيه ومحدش عارف ظروف التانى.
ووجهت نادية رسالة مباشرة إلى ابنتها قائلة:وعايزة أقول لبنتى على الملأ متلويش دراعك لحد وزى ما بابا علمنى وقال لى عشان تعرفى تغمضى عنيكى وتروحى فى النوم إوعى تعملى حاجة غصب عنك يعنى ماحدش يلوى دراعك وطالما يارشا بتعملى حاجة صح كملى وربنا كبير وحسبنا الله ونعم الوكيل.
يذكر أن الفنانة رشا سامي العدل أعلنت مؤخرا افتتاح سيارة لبيع المأكولات "البيتي" بشوارع مدينة دهب السياحية.
وأعلنت رشا ابنة النجم الراحل سامي العدل والفنانة نادية شكري في بث مباشر على صفحتها الخاصة بموقع الفيس بوك أن السبب الرئيسي لتنفيذها ذلك المشروع هو تجاهل المنتحين والمخرجين لها في الأعمال الفنية.
وقالت رشا في البث: أنا فتحت مشروع أكل وهنزل أبيع في الشارع في دهب، لأن أنا سعيت وفشلت كممثلة، المنتجين والمخرجين مش بيطلبوني وأنا مش بلومهم بس مش هستني لما أقول لله يا محسنين.
وتابعت: "أنا نقابية من 20 سنة والنقابة موفرالي ميزات زي كارنيه التأمين الصحي عشان لما أتعب أعرف أدخل مستشفى بسعر مخفض، وأنا عارفة إني لو طلبت من أهلي مش هيتأخروا.
وكانت رشا العدل قد كتبت عبر حسابها الرسمي على «فيسبوك»: «أنا حابة أقول كلمتين، أنا عارفة إن الأيام اللي جاية هايصدر مني فعل هاتهاجم عليه من بعض الناس وناس تانية هاتدافع عني، ناس احتمال تفتكر اني عايزة اعمل ترند وناس تانية هاتقول انه حقي و ناس تالتة هاتقول ايه الأفلام دي و احتمال اخسر ناس".
وأضافت: «الناس اللي تعرفني بجد هاتكون عارفة إن قراري ده كان بعد وقت طويل قوي من التفكير العميق وخوف من رد الفعل.. إذا كان من العامة أو أصدقائي أو المقربين، بس فيه ساعات كدة لازم الواحد يفكر في نفسه وياخد قرار حاسم علشان يرتاح لأنه لازم يحب شوية.. حبيت اقول الكلمتين دول علشان اعرف النهاردة انام مرتاحة لأني خايفة من بكرة، توكلت علي الله".
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
