أراد المطرب رامي صبري إنهاء الخصومة مع الملحن عمرو مصطفى، فوقع في أزمة جديدة مع الملحن محمد رحيم، الذي رفض أن يكون طرفاً في «حوار المصالحة» بين رامي وعمرو، وأصدر بياناً مطولاً للرد على اتهامه بمهاجمة نجاح الآخرين، ومنهم الفنان عمرو مصطفى بعد نجاح أغنية «بشرة خير»، وأكد رحيم أنه «صمت كثيراً» على اقتباس رامي لألحانه طوال السنوات الماضية.
وكتب محمد رحيم عبر حسابه الشخصي بموقع الفيس بوك: «ردي على صديقي الفنان الكبير رامي صبري بعد اتهامه لي في وسائل الإعلام إني بهاجم النجاح: مع كل الحب والتقدير، أولاً يعلم الله سبحانه وتعالى إني معنديش أدنى وقت أضيعه في إني أدخل في أي مواضيع؛ نظراً لانشغالي بمجموعة أعمال مهمة جداً إن شاء الله الناس هتشوفها قريب».
وتابع: «لكن تعليقاً على مشكلتك إنت وعمرو مصطفى اللي الحمد لله اتحلت في مداخلة إذاعية، وربنا مايجيبش زعل أبداً بين الإخوات، ولكن للأسف! اللي حصل إن اسمي تم إقحامه من طرفك بشكل لا يليق، ونظراً لأن المداخلة كانت على إذاعة مشهورة؛ فطبعاً اتسمعت من بعض أفراد عائلتي ومنهم بنتي، وأكيد قطاع كبير من جمهوري اللي بيحبني وبيحترمني وبيحب أعمالي؛ فوجب إني أرد عليك بكل حب واحترام علشان أوضح وأصحح المغالطات اللي حصلت في المداخلة».
وأضاف موجهاً حديثه للفنان رامي صبري: «إنت قلت في المداخلة بالنص إنك سنة 2013 هاجمتني بنفسك علشان أنا كنت «بحارب نجاح» كان أخويا الفنان عمرو مصطفى حققه وقت ماقدم أغنية «بشرة خير»، وكأن أنا راجل معنديش حاجة أعملها غير إني أهاجم وأحارب الناس الناجحين، وإنت اللي وقفت في وشي، وده طبعاً كلام مغلوط ومسيء ولازم أصححه وأبين للناس الحقيقة اللي سكت عنها سنين احتراماً للعشرة الطويلة والصداقة اللي بتجمعنا كلنا».
محمد رحيم: أنا مش ناقص نجاح
واستكمل: «أولاً أنا الحمد لله مش ناقص نجاح وتاريخ بفضل الله سبحانه وتعالى علشان أهاجم أي حد ناجح، ربنا يعلم إني بدعي في صلاتي بالرزق والتوفيق لكل الناس وبتمنى الخير للجميع، اللي حصل ساعتها إني علقت إن لحن «بشرة خير» شبيه إلى حد التطابق لعملين من أعمالي وهما أغنية «لا كده عاجبين» للمطربة الصاعدة إيمان سمير، وأغنية «كل ده يطلع منك» للنجمة شيرين وجدي، والأغنيتين صدروا سنة «2004» يعني قبل صدور لحن «بشرة خير» بـ9 سنين على الأقل».
وتابع محمد رحيم: «نظراً لنجاح «بشرة خير» وفرحتنا كلنا بيها، أنا قفلت الموضوع تماماً ومرضيتش أبين للناس أنا بقول كده ليه، ولكن الفيديو اللي تحت ده هو الفيصل اللي هيبين للناس إذا كنت بخترع كلام من دماغي واللا كلامي فعلاً صح بناء على علم ودراسة وخبرة، وإنت طبعاً راجل فاهم ودارس مزيكا برضه زينا».
محمد رحيم: رامي صبري نجح باستخدام ألحاني
وأوضح: «كما تم إرفاق لحنين آخرين من أعمالي وهما «أنا بحب عيونك» للفنان عمرو دياب، وأغنية «مشاعر» للفنانة شيرين عبد الوهاب، واللي حصل إني لقيت نفس اللحنين دول تم استعمالهم في أغاني خاصة بيك وحققوا نجاح كبير معاك من غير ما تضع اسمي عليهم على الأقل جنب اسمك، وطبعاً الفيديو هيوضح المسألة دي جداً حتى لغير المتخصصين، وواثق إن الجمهور هيتفاجئ، وفي ناس كتير هتستغرب أنا إزاي سكت طول السنين دي، والإجابة لأني إنسان مسالم ومحترم وعمري ما أسمح لنفسي أرفع قضية على زميل وأخ، ومؤمن بتوارد الخواطر وحسن النية دائماً، وطبعاً دي مش دعوة للتخلي عن الحقوق، ولكن العشرة الطيبة والمحبة والصداقة ليها علينا حق».
محمد رحيم: بشوف مجهودي وتعبي يُنسب لغيري
وأضاف محمد رحيم: «الخلاصة إنك هاجمتني قبل كده أكتر من مرة وما زلت لأني قلت كلمتين «فضفضة» هما من صميم حقي، وقوانين الملكية الفكرية واضحة ومفيهاش هزار في بلدنا، وفي كل دول العالم، وكنت بشوف مجهودي وتعبي بيُنسب لغيري وبستحمل وبسكت عشرات المرات، وللأسف! إنت اللي زعلان وبتتهمني إني كنت بهاجم النجاح، لأ أنا قطعاً مش بهاجم النجاح لإني والحمد لله صديق النجاح، أنا فقط كنت بعلق على استحياء وخجل على ظاهرة سلبية جداً ومتكررة في أسلوب العمل في الوسط الفني، وهي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين».
وتابع: «أنا عايز بعد تجربتك الأخيرة مع عمرو اللي سببت المشكلي دي كلها، الناس تحاول تتخيل أنا ساكت على إيه بقالي سنين، ولكن بعد الاعتداء على أعمالى وأفكاري ومجهودي ثم سكوتي وصمتي أطلع بحارب النجاح كمان! وكمان أطلع مش عاجب؟! لأ طبعاً ده كلام مرفوض تماماً وفعلاً أنا مش هسمح لأي حد يقوله وربنا يسامح الجميع، وطبعاً أنا برد على الملأ لأنه كلامك كان على الملأ؛ فلذا وجب التصحيح والتوضيح، مع تأكيدي إن عمرو مصطفى طبعاً أنا بعشقه وبحبه من قلبي، وإنت كمان أخويا وبحبك».
واختتم محمد رحيم، قائلاً: «الدليل إني أول مرة أتكلم على مواضيع زي دي حدثت منذ سنوات، ولكن زي ما إنت عندك أسرة وعندك جمهور تخاف على شكلك قدامهم، أنا كمان زيك بالظبط، مع تمنياتي بالتوفيق والنجاح الكبير للجميع، أخوك الموسيقار المصري العالمي المجتهد والمحترم والمحب محمد رحيم».
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
