شن الكاتب عمرو سمير عاطف هجوماً غير مسبوق على الفنان الكوميدي أحمد مكي، بعد تصريحات الأخير حول كتابة وتطوير شخصيته في مسلسل السيت كوم الشهير "تامر وشوقية" الذي صنع نجومية مكي، وأكد عمرو أن مكي "بالغ" في تقدير دوره، ونسب الى نفسه نجاح العمل، على غير الحقيقة، مطالباً الفنان بالإبتعاد عنه تماماً وعدم الإلتقاء به ولو صدفة.
عمرو نشر مقطعاً من حوار أحمد مكي مع الإعلامية منى الشاذلي حول سيت كوم "تامر وشوقية" وعلق عليه عبر حسابه الشخصي بموقع الفيس بوك قائلًا: "الواحد ما بقاش فيه حيل يدخل فى جدال والموضوع ما بقاش فارق قوي وخصوصاً ان تامر وشوقية كانت مرحلة عدى عليها سنين طويلة وانتهت".
تابع قائلاً: "الكلام اللي مكي قاله في اللقاء عن تامر وشوقية- العمل اللي كان بدايته الحقيقية والسبب اللي خلاه يبقي ممثل مش مخرج -كلام غير دقيق لأنه بيدي إيحاء انه كان له دور في تطوير الموضوع أانه كان سبب أن يبقى فيه حاجة اسمها ست كوم وانه بيحب "يذاكر" الموضوع وبيقول "جبنا كتب " و"عملنا "وده كله كلام فيه مبالغة فى تصوير دوره".
وقال: "الحقيقة هي أن مكي كان ها يخرج المسلسل فعلاً وماكنش بيقرا الحلقات ولا كان بيجهز نفسه لاخراج العمل كما يجب او -على الاقل - زي ما انا كنت متوقع ومنتظر منه ولغاية ما قربنا نخلص كتابه كان مشغول في اعمال تانية وما كناش بنشوفه خالص لدرجة اني انا اللي اشرفت على تصميم وتنفيذ ديكور الجزء الأول من المسلسل ..ولما ابتدى التصوير مكي اخرج أول حلقتين أانا وشريف عرفه-بصفته المنتج- والكتاب اتفرجنا عليهم وكان المستوى مش كويس ولو كان مكي استمر في اخراج الحلقات ما اعتقدش انها كانت ها تنجح شريف عرفه وقف التصوير بعد الحلقتين لمدة اسبوع وقرر انه ها يخرج هو الحلقات ومكى ها يعمل دور هيثم وقد كان".
ثم أضاف: "هل ده معناه ان مكي ما أضافش للعمل؟ لاء طبعاً مكي كان إضافة مهمة وكبيرة جداً لتامر وشوقية وفعلاً دور هيثم ماكنش مكتوب كده في الاول بس بعد ما مكي ابتدى يعمله بالطريقة دي ابتدينا نكتب الدور بطريقة مختلفة".
وأوضح رؤيته بقوله: "لكن تامر وشوقية ما اتعملش لان مكى كان عايز يعمل حاجه مختلفة تامر وشوقية انا فضلت سبع سنين الف بيه على المنتجين والمخرجين لغاية ما شريف عرفه تحمس لانتاج العمل وشخصية هيثم مش من ابداع مكي لوحده أنا والكتاب اللي اشتغلوا في العمل وشريف عرفه ساهمنا فى خروجها بالشكل ده ولما مكي راح يعمل فيلم اتش دبور طارق نور طلب مني اني ارفع قضية عليه بصفتي مؤلف الشخصية وشريف عرفه كلم هشام سليمان اللي كان بينفذ انتاج الفيلم وقاله لازم تدفعوا للمؤلف وكان ممكن جداً بمنتهى البساطة اننا نوقف تصوير الفيلم لكن انا رفضت اني اتخذ أي اجراء ورفضت اني آخد أي مقابل من هشام سليمان وقلت لشريف عرفة أنا ومكي كنا اصحاب وهو اختار انه ينهي الصداقة دي ويبقي نجم وفي الحقيقة ده تمن مش قليل يعني الراجل ما باعش بالرخيص ربنا يباركله والحمد لله بقي زي ما انتوا شايفين كده".
واختتم تعقيبه على تصريحات مكي قائلاً: "في النهاية أنا باحب تامر وشوقية جداً وخصوصاً اني تعبت فيه قوي ومكي فنان كبير وموهوب مش بس كممثل لكن برضه كمخرج ومازلت شايف انه لو رجع يخرج مرة تانية أكيد ها يبقى مخرج من اهم المخرجين في مصر ويمكن في تاريخ السينما المصرية.. لكن للأسف الواحد بيضطر يتكلم عن نفسه وعن مجهوده لما يلاقي تصرفات وكلام بيعكس نرجسية ورغبة في التكويش على كل حاجة زي ده، واتمنى التوفيق لمكي دايماً بس ما اعتقدش وما اتمناش اننا نتقابل تاني لا في شغل ولا حتى صدفة".
يذكر أن مسلسل "تامر وشوقية" عرض للمرة الأولى عام 2006 وتولى اخراج حلقاته الأولى شريف عرفة، وأخرج بقية حلقات المسلسل أسامة العبد، وشارك في بطولته أحمد الفيشاوي، مي كساب، جمال إسماعيل، رجاء الجداوي، انعام سالوسة، لطفى لبيب، نضال الشافعي، أحمد مكي، إنجى وجدان، محمد شاهين، وشهد بداية نجومية مكي بعد ابتكار شخصية أتش دبور.
لمشاهدة أجمل صور المشاهير زوروا أنستغرام سيدتي
