على الرغم من مرور أسابيع على حلقة رأس السنة التي عرضتها شاشة MTV مع الفنان جورج وسوف، كتبت المخرجة ريما الرحباني نقداً عن الحلقة عبر حسابها على الفايسبوك، مصوّبة على فريق برنامج "منا وجر" مشيدة بالفنان ومناقبيته.
وجاء في البوست "لفتتني جملة كتير مهمّة مؤلّفة من سِتْ كلمات فقط بمطلع هالسنة قالها جورج وسوف ومرقت مرور الكرام طبعاً لأن ما إلتقى حدا من المحاورين السبعة الكرام يسمعا أو يعلّق عليها".
وتابعت ريما "جورج وسوف سلطان الطرب قال حرفيّاً "انا ما بتجرأ غنّي للست فيروز". الحقيقة مش مهم حدا يسمعها بِقَدْر ما كان كتير مهم هالفنانين الزغار والكبار يسمعوها لعلَّ وعسى يتعلّموا من سلطان الطرب. يعني عدا عن إنّهن عم يخِلّوا بالحقوق.. ما بعرف منين عم بيجيبوا كل هالتواضع بإنّهن ع شوي، يتركوا أغانيهن الخاصة، إنْ وُجِدَت، وما يغنّوا إلا لفيروز.".
وختمت قائلة "تحيّة تقدير ومحبّة للكبير جورج وسوف.".
التعليقات تفاوتت بين من وافق ريما على أنّ الغناء للسيّدة فيروز يعتبر جرأة في غير مكانها من الفنانين لأنّ أغانيها خلقت لها، بينما تساءل كثيرون "أين المشكلة في أن يغنّي فنان لفيروز عربون محبّة؟ وكيف سيستمر الإرث إذ ما تمّ منع الناس من الغناء لها".
ريما ردّت موضحة بأنّها لا تقصد التهجّم على عامّة الناس كم فهم البعض من المنشور وقالت تعليقاً على التعليقات "يعني ما بعرف ليه في فئة من الناس بدها تتذاكى عليي وتعمل حالها مش فاهمة شو بقصد أو عمداً تفهم بشكل خاطئ! وكأنها مثلاً جايي من المرّيخ ومش عارفة بالتباديع اللي عم بتصير! أو كأني انا، لا سمح الله، عم إتهجّم على عامّة الناس!
إلا إذا انا واصلة اليوم من المرّيخ ومش عارفة إنّو كل الناس صاروا فنانين!".
كما حذفت ريما كل التعليقات التي أساءت إلى جورج وسوف، كما استنكرت تحوير كلامها وما أسمته محاولات التذاكي من قبل بعض المعلقين، وتابعت
"اوّل شي اللي مش عارف يعرف، انا مش جماهير انا من الورثة. الورثة لمعلوماتكن الخاصة مش دايما بيورثوا مال أو شقفة أرض، أوقات بيورثوا إرث فنّي ومعنوي ومسؤوليّة وحمل كبير بإنهن يحافظوا على هالإرث ويمنعوه من التشويه والتحريف والإجرام التجاري زي الحاصل ده.. أيْ وظيفتهم يحافظوا ع الأمانة اللي ورتوها. هالشي طبعاً ما بيقدر يفهمو إلا اللي عندو نُبُل وبيشوف أبعد من المادّيات. إي. وهاي بكل العالم منّو إختراع رحباني عرفتوا كيف؟ هاد قانون قانون سامعين بالقانون؟ إي قانون وعالمي. وانا بصفتي وريثة، إلي كل الحق مارس هالحق إن عجبكن او ما عجبكن. انا منّي، متل ما قال أو إعتقد البعض، بلجنة حكم تقول هاد غنّى منيح وهاد لاء بعد بدّو! وإتكتّف وإتفلسف وصنّف الهواة! إي.. أنا إلي كل الحق إسمح أو إمنع.. إيه والله متل ما عم خبّركن.".
وواصلت ريما شرح فكرتها قائلة "وانا مش مُتابِعة للوسط الفني العجيب وعم شوف التباديع بحق هالإرث فكيف اللي بيتابع متل أفضالكن؟ المفروض يكون شايف أكتر منّي بمنيح. فمن المفروض كمان يفهم شو عم قول ومش يحرّف بكلامي او يفهمو ع ذوقو! ومحبة الناس لفيروز مش تيستغلوها الفنانين الآخرين وبحجّة هالمحبّة يغنّولها.. قال شو تتضل الناس تحبّا وما تنساها؟ ".
وتساءلت ما إذا كانت هذه الحجة منطقية خاتمة بالقول
"ما تآخذوني يعني بس اذا هول العجايب اللي عم بيشوّهوا الأغاني الأصليّة هنّي اللي رح يخلوا فن فيروز والأخوين ما ينقرض!! بالإذن من الجميع، انا ساعتها وبصراحة تامّة، بفضّل ينقرض.. أو هنّي ينقرضوا! وبيكون أفضل بكتير أكيد. بس ع الأكيد وحدة من التنين. وشكراً.".
بعد تجربة مريرة.. نهى نبيل تحذر متابعيها من عمليات التجميل
شمس الكويتية تثير الجدل بسبب هذا الفيديو
لمشاهدة أجمل صور المشاهير زوروا أنستقرام سيدتي
