اعتادت النجمة ليلى علوي التواجد يومياً بماراثون دراما رمضان طوال السنوات الماضية إما ببطولة المسلسلات، أو تقديم حملات إعلانية، ولكنها انضمت لقائمة "الغائبين" عن الإثنين في موسم 2019، ما دفعها لاستثمار حسابها على موقع إنستقرام، لتقديم رسائل تنمية بشرية بعنوان "30 يوم سعادة".
ليلى الغائبة عن مسلسلات رمضان منذ العام 2016 عندما قدمت بطولة مسلسل "هي ودافنشي" مع النجم خالد الصاوي، بدأت بنشر رسالة مصورة يوميا عبر حسابها بموقع إنستقرام، تتحدث فيها يوميا عن صفة إنسانية يجب أن يتحلى بها الإنسان مثل الرضا وصلة الرحم والصبر والمعاملة الحسنة.
وقالت في فيديو لها نشرته عبر إنستقرام: كلنا عارفين طبعًا إن رمضان شهر الخير والبركة والعبادات، كل واحد فينا بيحاول يطلع أحسن ما عنده في الشهر ده.. إيه رأيكم لو كان جنب الروحانيات والعبادات دي تحدي بسيط.. تحدي من نوع تاني تحدي للسعادة.. محاولة جادة وحقيقية إننا نحاول نِفرح ونفرَّح كل اللي حوالينا.. نغير حاجات لو بسيطة في روتين يومنا عشان نحس براحة أكتر وسلام داخلي أكبر شاركونا بصوركم وحكاياتكم.
ونشرت رسالة عن صلة الرحم في رمضان قالت فيها: مع أول خروجة مع العيلة بنرجع بالزمن لأيام حلوة وذكريات جميلة ماتتنسيش، أيام دافية ومشاعر بريئة.. ماينفعش رمضان يعدي من غير مانتجمع مع العيلة ونفطر ونشوف مسلسلات ونحّلي بحاجة حلوة عاملينها بإيدينا.. يلا بقى هتفطروا مع عيلتكم إمتى؟
أضافت رسالة أخرى عن الرضا بقولها: اللي ربنا يكتبهولنا لازم نرضا بيه، ده الجرح لو جه من حبيب مابيوجعش، ما بالك بحكم الله لو كان عكس ما يرضينا.. مانرضاش بيه ونقول موافقين ومبسوطين؟
لو رضينا باللي كاتبه ربنا واعتمدنا عليه.. مش هنحتاج حاجة من حد! الراضي غني، الراضي في نعمة.. يبقى لازم نقول الحمد على كل صعب مرينا بيه.. ونقول الحمد لله أننا عندنا نعمة الرضا.
