أكدت مصادر من نقابة المهن التمثيلية في مصر، أن وفاة الفنان تامر ضيائي ليست نتيجة لأزمة قلبية مفاجأة، وأكدت وجود شبهة جنائية بعد تأكيد شهود عيان أن الراحل تعرض للضرب أثناء مرافقته لزوجته في رحلة علاج من السرطان، وتوفى متأثرا بالاعتداء، ومن المنتظر ان تعلن الشرطة المصرية تفاصيل الحادث خلال الساعات القليلة المقبلة.
المصدر أكد أن تامر ضيائي كان بحالة صحية جيدة، وذهب لمرافقة زوجته لتلقي جرعة العلاج الكيماوي الخاصة بها، ولكن ضيائي تورط في مشاجرة وتعرض للضرب وسقط متوفيا إثر الاعتداء عليه، وسيتم الكشف عن التفاصيل الكاملة بعد انتهاء الشرطة من التحريات حول الواقعة.
تابعي المزيد: بعد شهرين من ترك وصيته.. وفاة الفنان تامر ضيائي
وفاة تامر ضيائي بعد 3 شهور من إصابته بجلطة
وكان الفنان تامر ضيائي، قد تعرض نهاية شهر أبريل، لوعكة صحية مفاجئة، دخل على إثرها العناية المركزة، حيث حرص على توجيه الشكر لكل من سانده في تلك المحنة الصحية، في مقدمتهم أسرته، قائلاً: "الشدة بتبين الصديق الحقيقي من الصديق التيك أواي. أنا مريت في الأيام القليلة إللي فاتت بأزمة قلبية أدت لدخولي الرعاية المركزة وعمل قسطرة وتركيب دعامة، والحمد لله مرت على خير".
وحرص عدد من الفنانين على نعي تامر ضيائي، منهم الفنانة ميريت عمر الحريري، والتي كتبت قائلة: "خبر محزن وموجع. صحبي الغالي الفنان تامر ضيائي في ذمة الله.
الله يرحمك يا تامر، الإنسان الخلوق صاحب صحبه. المحترم اللي الضحكه ماكنتش بتفارقه حتي في عز أزماته. هتوحشنا يا صحبي. إنا لله وإنا إليه راجعون".
تفاصيل وصية تامر ضيائي
وتأتي وفاة تامر ضيائي، بعد مرور نحو شهرين على ترك وصيته عبر حسابه الشخصي على "فيس بوك"، حيث قال: "بوست وصية ده هيفضل باين على صفحتي لحد ما أموت. الحقيقة إللي كلنا عارفينها ومتأكدين منها إننا كلنا ربنا كتبلنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل، وأنا مش عايز حد يعملها لمجرد إنها معروفة، ووقتها طبعاً مش هعرف أقولها لحد".
واستعرض تفاصيل الوصية، بقوله: "صلاة الجنازة أهم من العزاء، وهي إللي كل ما العدد زاد كل ما ثوابي ما كان أكتر، فأرجوكم تصلوا عليا. مش شرط تيجي العزاء وياريت لو اتعمل في البيت أو مكان بسيط بفلوسه تطلعولي صدقة جارية أفضل، من فضلكم لم يثبت أو يتفق عليه عمل خاتمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت إللي هتقروا فيه جزء فضوا نفسكم واقعدوا ادعوا فيه".
وتابع: "بلاش صدقة جارية تقليدية وسهلة، ومش مستفاد بيها، يعني المصاحف كتير في مصر أوي وكل بيت فيه كتير، فممكن نحط الفلوس في جامع بيتبني أو كرسي متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة. دي نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور إللي عندهم ومفيش حاجة بتقول إن العياط معناه عدم رضا بقضاء ربنا، وابيضت عيناه من الحزن فهو كظيم".
وأضاف الفنان تامر ضيائي، قائلاً: "أهم حاجة تاني هي الدعاء وبس والصدقة. من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال، لأن ده أهم وقت ليّا وياريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني فى ليلة زي دي. الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هوّنوه على نفسكم بالدعاء ليّا عشان أبقى فى سعادة لحد ما أقابلكم تاني. إللي بيحبوني يدعولي كتير عشان لو مفيش حد يدعيلي، ودي مهمة أوي أوي أوي، عاوز الكل يسامحني على أي حاجة عملتها فيه بقصد أو بدون قصد".
يُذكر أن تامر ضيائي، شارك في موسم دراما رمضان الماضي، من خلال مسلسل "فراولة" بطولة الفنانة نيللي كريم، وسبق وشارك في عشرات المسلسلات والأفلام، منها مسلسل "عملة نادرة"، "إلا أنا"، "قصر النيل"، "النهاية" بطولة يوسف الشريف، "زلزال" مع محمد رمضان، "بركة" مع عمرو سعد، "رسايل" مع مي عزالدين، و"هربانة منها" مع ياسمين عبدالعزيز وغيرها.
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
