أكدت الفنانة ريهام عبد الغفور، أنها اعتادت عدم التخطيط للمستقبل لأنها مؤمنة أن الدنيا يمكن أن تتغير في ثانية، وأشارت إلى أن جائحة كورونا أكدت لديها هذا الشعور، وتحدثت ريهام عن الانطباعات الأولى في حياتها عن الحب والعمل.
أضافت ريهام عبد الغفور، أثناء حلولها ضيفة على إيناس الشواف، بالبرنامج الإذاعي "لأول مرة": بعد العامين الماضيين اتعودت أعيش اللحظة بكل حاجة فيها لأن الدنيا بتتشقلب في ثانية ولا أضع خططاً للأيام المقبلة، و2020 صدمتنا شوية لكن الجاي أحلى، وأول كل حاجة دائما بيبقى ليها طعم تاني.
أشارت إلى أن الانطباعات الأولى تدوم وقالت: بس أنا لا استعجل في الحكم على الناس، وبديلهم فرصة ولا أحب تكوين فكرة عن الأشخاص من أول مرة، ولو حد واخد انطباع عني غلط كنت ممكن أصححه له، وببقى مقهورة لغاية ما أصحح له الفكرة لكن دلوقتي لا مش ببذل المجهود قوي.
تابعت قائلة: الحب الأول مش وهم ومش هييجي زيه لكن لما بنكبر شوية بيكون الحب حقيقي أكتر، وبعد كورونا بقيت ممتنة لكل الحاجات اللي كانت عادية زي إني قادرة أزور أهلي وأسافر.
وواصلت قائلة: شخصيتي لا تعرف اليأس، وأنا شخص مقاتل وبكمل لو عملت حاجة منجحتش بتعلم منها، وكل عمل بدخله بشتغل كأني أول مرة أشتغل، وأمثل بنفس الحماس والتوتر وكل حاجة ولو عملت حاجة ومنجحتش التجربة اللي بعدها بيبقى عندي حماس أكبر عشان مش عاوزة اتهزم أو أتكسر.
وتابعت: أول حاجة أحب أبدأ بيها يومي إني أشوف ابني الصغير وأبوسه وأحضنه، وأول حد بتصل بيه هي أمي وأول مشروب ليا الشاي بلبن.
وتابعت: "ول لعبة في الجيم بمشي شوية على المشاية لكن أنا مش غاوية رياضة، ومؤخرا اتجهت لليوجا.
وعن بدايتها الفنية قالت: أول لوكيشن صورت فيه كان ستوديو النحاس وأول مشهد تمثيل مع أستاذ يوسف شعبان ونهال عنبر في العائلة والناس.. أول عمل حسيت إنه بدايتي الحقيقية هو فارس بلا جواد والناس التفتت لي فيه، وأول حاجة عملت جمهور كبير أكثر كان مسلسل الريان.. أول مرة بعمل دور واحدة قاسية القلب بزيادة؛ شخصية عايدة في قصر النيل.
واختتمت قائلة: أنا مبحبش الناس المتملقين والبخلاء والناس اللي مبيطمرش فيها بس دي بتحتاج وقت عشان تعرفيهم.. أنا بحب البيتزا وهي اختياري الأول في أي مكان بروحه.
لمشاهدة أجمل صور المشاهير زوروا أنستغرام سيدتي
